ایران په خپل څو کلن سوداګریز پلان کې له افغانستان سره د سوداګرۍ کچې هدف تر لس میلیارده ډالرو ټاکلی دی. د ایران د خراسان رضوي والي وايي، چې ددوی یو پلاوی په همدې موخه په کابل کې د طالبانو له ادارې سره په خبرو اترو بوخت دی.
د ایران د خراسان رضوي والي غلامحسین مظفري ویلي چې د ایران د ملي اقتصاد په پیاوړتیا او د بندیزونو د اغېزو په کمولو کې د ختیزو پولو رول ډېر مهم دی.
د هغه په وینا، د ایران په تایباد ولسوالۍ کې د څو مهمو زیربنایي پروژو کارونه پیل شوي، چې د لمریزې برېښنا د تولید ۲۰ مېګاواټه پروژه، د سون توکو ښارګوټی، د ازادې سیمې د احاطې او زیربناوو پراختیااو په دوغارون سیمه کې د موټرو د پلاک کولو د سیستم برابرول پکې شامل دي.
نوموړي افغانستان د ایران د اقتصاد لپاره یو مهم او لوړ ظرفیت لرونکی بازار بللی.
هغه زیاته کړې چې دا اقدامات د پانګوالو اړتیاوو ته د ځواب ویلو لپاره کېږي او تمه ده چې دوغارون د اقتصادي ودې او سیمهییزې پراختیا په مرکز بدل شي.
مظفري له افغانستان سره د سوداګرۍ په اړه وویل چې اوس مهال د دواړو هېوادونو ترمنځ له څلورو میلیارد ډالرو زیات تجارت د همدې پولې له لارې کېږي او د ایران اقتصادي پلاوی په کابل کې د خبرو اترو په حال کې دی، چې د څو کلونو په ترڅ کې دغه کچه تر لس میلیارده ډالرو لوړه شي.
هغه همدارنګه د ترانسپورټي دهلیزونو اهمیت ته په اشارې ویل چې د تودو اوبو بندرونو ته دافغانستان او منځنۍ اسیا هېوادونو د لاسرسي اصلي مسیر د ایران له لارې دی، نو ځکه دده په وینا، په خراسان رضوي، جنوبي خراسان او سیستان بلوچستان کې د رېل او سړک شبکو پراختیا د حکومت په لومړیتوبونو کې ده.
