سیمهییزو رسنیو راپور ورکړی چې افغان لیکوال او د کابل پوهنتون پخوانی استاد حبیبالله رفیع له څو کلونو جلاوطنۍ وروسته بېرته افغانستان ته راستون شوی دی. استاد رفیع له تګ وړاندې ویلي وو چې د وطن د مېوو په خوراک مې ممکن د ستروګو نور بېرته راوګرځي.
نوموړی، چې تر دې وړاندې په کاناډا کې مېشت و، کابل ته رسیدلی دی. د راپورونو له مخې، ښاغلی رفیع له څه مودې راهیسې د سترګو له ناروغۍ سره مخ دی.
نوموړي تر دې وړاندې ویلي وه چې: «وطن ته ځم، چې د وطن تازه مېوې وخورم؛ کېدای شي د سترګو نور مې بېرته راپیدا شي.»
د استاد رفیع د راستنېدو خبر د ګڼو هېوادوالو له مثبت غبرګون سره مخ شوی دی. په ټولنیزو رسنیو کې ډېرو کسانو د هغه د بېرته راستنېدو هرکلی کړی او دا یې د هېواد د علمي او فرهنګي شخصیتونو د حضور لپاره یو مثبت ګام بللی دی.
دا په داسې حال کې ده چې د طالبانو له بیا واکمنېدو وروسته ګڼ شمېر افغان کادرونه له هېواد نه وتلو ته اړ شوي دي، چې د کارپوهانو په وینا دا وضعیت په افغانستان کې د مسلکي او تخنیکي ظرفیتونو د کمښت لامل شوی دی.
