په هلمند کې د سويل ختيځ زون د پنځو ولایتونو د فوټبال سيالۍ پيل شوې
د هلمند ولايت په مرکزي لوبغالي کې د سويل ختيځ زون په کچه د غوره لوبډلې ټاکلو په موخه د فوټبال سيالۍ پيل شوې، چې د پنځو ولايتونو لوبډلې پکې ګډون لري او ټاکل شوې پنځه ورځې دوام وکړي.
د هلمند ولايت په مرکزي لوبغالي کې د سويل ختيځ زون په کچه د غوره لوبډلې ټاکلو په موخه د فوټبال سيالۍ پيل شوې، چې د پنځو ولايتونو لوبډلې پکې ګډون لري او ټاکل شوې پنځه ورځې دوام وکړي.
د طالبانو د المپیک، بدني روزنې او سپورټ ریاست وایي، په دغو سياليو کې د ارزګان، غزني، زابل، کندهار او کوربه هلمند لوبډلو ګډون کړی دی.
یاد ریاست ویلي، د سياليو په پیل لوبه کې د کندهار لوبډلې خپلې سيالې غزني لوبډلې ته د ۱-۰ ګول په توپير ماته ورکړه.
په سلګونو لاریون کوونکو د فوټبال نړیوال جام کې د ایران د لومړۍ لوبې څخه مخکې د لاس انجلس لوبغالي بهر راټول شوي وو، چې د ایران حکومت ضد شعارونه یې ورکول. ایران په دې نړۍوالو سیالیو کې خپله لومړۍ لوبه د نیوزیلنډ په وړاندي دوه پر دوه مساوي کړه.
د امریکا په لاس انجلس لوبغالي کې ګڼ شمېر د فوټبال مینه والو د ایران د لوبډلې ملاتړ کاوه، خو ځینو امریکايي مېشتو ایرانیانو بیا د تهران پر وړاندې د اعتراض شعارونه او سمبولونه له ځان سره لرل.
رویټرز په خپل یو خبر کې ویلي، چې د ایران او نیوزیلنډ د لوبې تر پیل وړاندې د میدان بهر هم وضعت عادي نه وو. د واشنګټن او تهران ترمنځ د سولې د هوکړې تر اعلان ۲۴ ساعته وروسته ایران ملي لوبډلې یوازي په امریکا کې د فوټبال په نړۍوال جام کې خپله لومړۍ سیالۍ تر سره کړه.
د راپور له مخې، دغه جګړه هغه مهال پیل شوې وه چې امریکا او اسراییل په فبرورۍ میاشت کې پر ایران بریدونه وکړل او اوس د سولې له اعلان وروسته د ایران لوبډله په امریکا کې د نړیوال جام سیالۍ ترسره کوي.
دغه لاریونونه په امریکايي کې د ایران حکومت د مخالفو فعالانو له خوا رهبري کېدل.
د سږني نړیوال جام په سیالیو کې د ایران ګډون له بېلابېلو جنجالونو او ستونزو سره مل و. د ایران فوټبال فدراسیون مخکې ویلي وو چې د لوبډلې د ځینو غړو لپاره د ویزو په ترلاسه کولو کې ستونزې موجودې وې او د مینهوالو لپاره هم ځینې محدودیتونه لګېدلي وو.
په ورته وخت کې، د ایران د پخواني (له ۱۹۷۹م کال مخکې) بیرغ د کارولو موضوع هم په یوه جنجالي بحث بدله شوې ده. فیفا اعلان کړی چې په لوبغالو کې د سیاسي بڼې لرونکي بیرغونه او نښې منع دي، خو د ایران د پخواني بیرغ په اړه یې تر اوسه روښانه دریځ نه دی څرګند کړی.
د کندهار د عینو مینې ښارګوټي ځینو اوسېدونکو افغانستان انټرنشنل ته وویل، چې طالبانو په دې سیمه کې له ځوانانو د کرېکټ وسایل او بېټونه ټول کړي دي.
د کندهار د عینو مینې ښارګوټي ځینو اوسېدونکو نن دوشنبه، د غبرګولي پر ۲۵مه وویل، چې د طالبانو د کندهار ۱۲ حوزې امنیتي ځواکونو د کرکټ وسایل او بېټونه وړي دي.
په رالېږل شویو انځورونو کې ښکاري چې په ۱۲مه حوزه کې طالبانو یو شمېر نور لوبتوکي هم غونډ کړي دي.
د یادونې وړ ده، چې په روانه غبرګولي میاشت کې په هلمند کې ځايي سرچینو افغانستان انټرنشنل ته ویلي و، چې طالبانو د مولوي هبتالله اخوندزاده په امر په لښکرګاه کې د کرېکټ د یوه معیاري لوبغالي د ویجاړولو عملي چارې پیل کړې.
هبتالله هلمند ته په خپل وروستي سفر کې د کرېکټ په لوبغالي کې د عیدګاه جومات د بنسټ ډبره کېښوده.
هغه ویډیوګانې او انځورونه چې افغانستان انټرنشنل ته رسېدلي، ښکاري چې له لوبغالي څخه ورزشي او نور ودانیز توکي د انتقال په حال کې دي او په عملي توګه د کرېکټ د یاد معیاري لوبغالي د وېجاوړولو چارې پیل شوي دي.
له دې وړاندې په هلمند کې د کرېکټ لوبغاړو افغانستان انټرنشنل ته ویلي و، چې د طالبانو لهخوا د کرېکټ معیاري لوبغالی په عیدګاه جومات بدلیدونکی دی.
د افغانستان د کرېکټ ملي لوبډلې د یو ورځنیو نړیوالو لوبلړۍ په لومړۍ سیالۍ کې له کوربه هند څخه د اوو وېکټو په توپیر ماتې وخوړه. دغه لوبه نن د هند په درمسالا کرېکټ لوبغالي کې ترسره شوه، چې د باران له امله د «ډياېلایس» سیستم له مخې ۲۵ اورونو ته راکمه شوې وه.
په دې سیالۍ کې هند د پچې له ګټلو وروسته لومړی د توپاچونې پرېکړه وکړه. د افغانستان د کرېکټ ملي لوبډلې په ۲۴،۵ اورونو کې د خپلو ټولو لوبغاړو په سوځېدو ۱۹۴ منډې جوړې کړې، چې په دې لړ کې رحمانالله ګربز د ۱۰۲ منډو په جوړولو سره تر ټولو غوره لوبه وکړه او د خپلو شپږیزو شمېر یې تر ۲۰۰ زیات کړ.
د هند په توپاچوونکو کې ګورنور برار او حارش دیوبي هر یوه وکولای شول درې درې افغان لوبغاړي د لوبې له ډګره بهر کړي. بل لور ته، هندۍ لوبډلې د افغان لوبډلې له خوا ټاکل شوی هدف په ۲۲،۵ اورونو کې د یوازې درېیو لوبغاړو په زیان سره پوره کړ او بریا یې خپله کړه.
د افغانستان د کرېکټ لوبډلمشر حشمتالله شهیدي په دې لوبه کې د ۲۷ منډو په جوړولو سره په یو ورځنیو نړیوالو سیالیو کې د خپلو ټولو منډو شمېر ۲ زره او ۵۰۰ ته ورساوه. هغه له رحمت شاه، محمد نبي او شهزاد وروسته د افغانستان د کرېکټ په تاریخ کې څلورم لوبغاړی شو چې تر ټولو ډېرې منډې یې جوړې کړې دي.
د افغانستان او هند ملي لوبډلې به په دې لړۍ کې دوه نورې لوبې هم ترسره کړي. د دواړو لوبډلو ترمنځ راتلونکې سیالۍ به د راتلونکې چهارشنبې په ورځ د هند په لکنو ښار کې ترسره شي.
د افغانستان کرکټ بورډ ویلي، د ملي لوبډلې چټک توپ اچوونکی محمد سلیم ساپی د هند پر وړاندې د یو ورځنیو نړیوالو سیالیو په اصلي نوملړ کې شامل شوی. نوموړی په وروستۍ ټېسټ لوبه کې د غوره توپ اچونې له امله د پام وړ وځلېد او شپږ ویکټې یې ترلاسه کړې وې.
د افغانستان کرکټ بورډ ویلي، چې د ملي لوبډلې ښي لاسی چټک توپ اچوونکی محمد سلیم ساپی چې د هند پر وړاندې په یوازینۍ ټېسټ لوبه کې یې د پام وړ توپ اچونه کړې وه او شپږ ویکټې یې ترلاسه کړې وې، د همدې ښه فعالیت له امله د یو ورځنیو سیالیو په اصلي ترکیب کې ځای وموند.
د کرکټ بورډ په وینا، نوموړی له دې وړاندې د همدې سیریز لپاره د احتیاطي لوبغاړو په ډله کې شامل و، خو اوس د اصلي لوبډلې برخه دی.
کرکټ بورډ هیله څرګنده کړې چې دغه ځوان توپ اچوونکی به په یو ورځنیو سیالیو کې هم د افغانستان لپاره ښه وځلېږي او د لوبډلې په بریاوو کې به مهم رول ولري.
د افغانستان د کرېکټ الف لوبډلې (افغان ابدالیان) د سریلانکا په کوربتوب د الف لوبډلو د درې اړخیزې لوبلړۍ په ترڅ کې په خپله لومړۍ لوبه کې د هند الف لوبډلې ته د ډياېل سیسټم لهمخې د ۴ منډو په توپیر ماتې ورکړه او په یادو سیالیو کې یې خپل سفر په بریا سره پیل کړ.
د افغانستان کرېکټ بورډ د پنجشنبې په ورځ (د غبرګولي ۲۱مه) د یوې خبرپاڼې په خپرولو سره وايي، د دغې لوبې پچه افغان لوبډلمشر عمران میر وګټله او لومړی یې د توپ اچونې پرېکړه وکړه. سیالې هندۍ لوبډلې په لومړۍ پاڼۍ کې د خپلو ۹ لوبغاړو په زیان سره ۳۴۹ مندې جوړې کړې او افغان لوبډلې ته د ۳۵۰ منډو هدف وټاکه.
د افغان لوبډلې په ګټه عبدالله احمدزي غوره توپ اچونه وکړه او ۵ سیال لوبغاړي یې له ډګره بهر کړل. د نوموړي ترڅڼګ فرمانالله ساپي ۳ او عمران میر یوه وېکټه ترلاسه کړه.
دغه لوبه چې په لومړۍ پاڼۍ کې هم د ورښت له امله ځنډېدلې وه، د دویمې پاڼۍ له پیل وړاندې یو ځل بیا له ځنډ سره مخ شوه، چې له پیلېدو سره سم ۳۸ اورونو ته کمه شوه او د ډياېل سیسټم لهمخې افغان لوبډلې ته د ۲۹۴ منډو هدف وټاکل شو.
افغان الف لوبډلې د هندالف لوبډلې پر وړاندې په دویمه پاڼۍ کې په زړه پورې توپوهنه وکړه او د ۲۵،۵ اورونو په لوبولو سره ۱۷۷ منډې جوړې کړې، چې وروسته لوبه د درېیم ځل لپاره د باران له امله وځنډېده. د پرلپسې ورښت له امله، لوبه بېرته پیل نهشوه او د ډياېل سیسټم لهمخې، افغان لوبډله له سیالې لوبډلې څخه ۴ منډې مخکې وه، چې په پایله کې دغه مهمه لوبه د ۴ منډو په توپیر د افغان ابدالیانو په ګټه اعلان شوه.
د افغان لوبډلې په ګټه لوبډلمشر عمران میر ، بهیر شاه محبوب ۵۱ او حسن عیسیخېل ۳۴ منډې جوړې کړې او د افغان لوبډلې په بریا کې یې ستره ونډه ترسره کړه او افغان لوبډلمشر عمران میر د لوبې غوره لوبغاړی ونومول شو.
افغان ابدالیان به په خپله دویمه لوبه کې د راتلونکې شنبې په ورځ د کوربه سریلانکا الف لوبډلې پر وړاندې د سیالۍ ډګر ته ښکته شي.