پاکستان: د افغان کډوالو د ایستلو بهیر دې په ۴۵ ورځو کې بشپړ شي
د خېبرپښتونخوا د کورني او قبايلي چارو سلاکار طارق سعید د افغان کډوالو د ستنېدو د ارزونې په غونډه کې ټينګار وکړ، چې د کډوالو د ایستلو پروسه دي په ۴۵ ورځو کې بشپړه شي. نوموړي مسولینو ته امر کړی چې د هغو کسانو د ملکیتونو پر وړاندې اقدامات وکړي چې غیري قانوني مېشت دي.
د افغانستان انټرنشنل - پښتو خبریال جواد شینواری وايي، چې په پاکستان کې د افغان کډوالو د نیولو او شړلو پروسه یو ځل بیا چټکه شوې او په یو شمېر سیمو کې کډوالو ته د ژر ایستلو وخت ورکړل شوی.
د خېبرپښتونخوا چارواکو د کډوالو د ایستلو د ارزونې په راپور کې ویلي، چې دا مهال په پېښور، کوهاټ، چارصده او هانګو کې د کډوالو کمپونه فعال دي.
صارق سعید د کډوالو د ایستلو په برخه کې امنیتي او ملکي چارواکو ته امر کړی، چې د غیري قانوني بهرنیو وګړو د ایستلو بهیر چټک او په درناوي یې پر وخت تر سره کړي.
دا پرېکړه د پاکستان د هغه روان کمپاین دوام بلل کېږي چې له ۲۰۲۳ کال راهیسې د بې اسنادو بهرنیانو، په ځانګړي ډول افغان کډوالو، د بېرته ستنولو لپاره پیل شوی او تر اوسه یې سلګونه زره کسان په زور افغانستان ته ستانه کړي دي.
