د طالبانو د ریاستالوزرا اقتصادي مرستیال ملا عبدالغني برادر په مشرۍ د اقتصادي کمېسیون غونډه کې په افغانستان کې د بېکارۍ پر کمولو خبرې شوې دي. په دې غونډه کې د اوو زونونو د والیانو پر وړاندیزونو هم بحثونه شوي دي.
د طالبانو د ریاستالوزرا اقتصادي معاونیت اقتصادي کمېسیون په غونډه کې په هېواد کې د بېکارۍ د کچې پر راکمولو، د اقتصادي پروژو د ښه او پر وخت تطبیق او د صادراتو او وارداتو لپاره د لا زیاتو اسانتیاوو د رامنځته کولو په اړه خبرې شوې دي.
د طالبانو د اقتصادي کمېسیون غړو دغه راز د خامو نفتي موادو د تصفیې او هېواد ته د واردېدونکو درملو د مجازو اقلامو د لیست د پراختیا په تړاو هم بحثونه کړي دي.
د یاد معاونیت د معلوماتو له مخې، د غونډې برخه والو همدارنګه د صنعتي ساحو د نقشو د ژر ویزه کولو، د امارتي ځمکو د اجارې بهیر د تنظیم او همغږۍ او د صادرېدونکو غوښو د بیو د لوړوالي او د صادراتو د پراختیا په اړه خبرې کړې دي.
د طالبانو د ریاستالوزرا د اقتصادي معاونیت د معلوماتو له مخې، په غونډه کې پر یادو ټولو موضوعاتو لازمې پرېکړې او تصامیم ونیول شول.
دا غونډه په داسې حال کې جوړېږي چې په هېواد کې د بېکارۍ او بېوزلۍ کچه لوړه شوې او خلک د اقتصادي ستونزو له امله شکایتونه کوي.
