د ټرمپ واکمنۍ کې د کډوالو په توقیفځایونو کې د یوه افغان په ګډون لسګونه کډوال مړه شوي
د رویټرز اژانس د نوې ارزونې له مخې، د ټرمپ د حکومت له خوا د کډوالو د نیولو د توندې لړۍ په اوږدو کې، د امریکا د کډوالۍ ادارې په توقیفځایونو کې د مړینې کچه تر دوه برابره زیاته شوې ده. په دغو قربانیانو کې محمد پکتیاوال هم شامل دی، چې په ۲۰۲۱ کال کې امریکایانو واشنګټن ته بېولی و.
د رویټرز د ارزونو لهمخې، په تېرو کلونو کې په هرو ۳۸۴۸ بندیانو کې د مړینې کچه یو کس و، اوس په هرو ۱۶۳۰ کسانو کې یو کس مړ شوی دی.
په راپور کې ویل شوي چې د ۲۰۲۵ کال د جنوري میاشت راهیسې د ټرمپ لهخوا د کډوالو د اېستلو د کمپاین له پیل راهیسې تر اوسه ۵۰ کډوالو د کډوالۍ او ګمرکونو د ادارې په توقیفخونو کې خپل ژوند له لاسه ورکړی دی.
روغتیايي کاروپوهانو درویټرز ته ویلي چې د مړینې د کچې لوړېدل د توقیفځایونو دننه د روغتیايي پاملرنې او جدي څارنې په اړه سختې پوښتنې راپورته کوي. د دوی په خبره په مړو شویو کسانو کې ۲۱ تنه داسې وو چې مړي یې وروسته وموندل شوي او د مړینې لاملونه یې د زړه حملې او د لس کسانو مړینه ځان وژنه ښودل شوې.
کارپوهان وايي چې دا وضعیت د پېچلو او دوامداره ناروغیو لرونکو کسانو د بندي کېدو له امله رامنځته شوی دی. بل خوا د امریکا د کورني امنیت وزارت وايي چې دوی کډوالو ته بشپړ خدمات وړاندې کړي او په مرکزونو کې خوندي او انساني چاپیریال رامنځته کولو ته ژمن دي.
په مړه شویو کسانو کې د محمد پکتیاوال په نوم یو افغان کډوال هم شامل دی، چې د افغانستان د ځانګړو ځواکونو پخوانی سرتیری و او په ۲۰۲۱ کال کې د امریکایي ځواکونو لهخوا له خپلې کورنۍ سره یوځای امریکا ته انتقال شوی و. دغه افغان کډوال چې د خپلو ماشومانو د ښوونځي په لاره کې نیول شوی و، له نیول کېدو یوه ورځ وروسته په روغتون کې د ساه بندۍ له امله ومړ.
