د فرانسې د جرمونو ضد څارنوالۍ ویلي چې د مانش کانال سیمه کې د کډوالو د کښتۍ ډوبېدو په قضیه کې ۱۴ تورن کسان، چې افغانان هم پکې شامل دي، محاکمه کوي. پېښه د ۲۰۲۱ کال په نومبر کې شوې وه، چې په پایله کې یې ۳۱ کډوال د فرانسې او بریتانیا ترمنځ اوبو کې مړه شول.
د فرانسې عدلي چارواکو ویلي پر دغو کسانو د غیرعمدي وژنې، غیرعمدي ټپي کولو، په منظمه توګه د غیرقانوني کډوالۍ د اسانتیا برابرولو او په جرمي شبکو کې د ګډون تورونه لګېدلي دي.
د فرانسې خبري اژانس خبر ور کړی، چې ډېری تورن کسان د افغانستان او عراق اوسېدونکي دي او داسې شک کېږي چې د انساني قاچاق له شبکو سره یې همغږي لرله.
په ورته وخت کې د دې قضیې په جلا برخه کې د فرانسوي سمندري ځواکونو د ځینو غړو په اړه هم څېړنې روانې دي. هغوی له خطره سره د مخ کسانو په ژغورنه کې د پاتې راتلو له امله تر پلټنو لاندې دي.
د څېړنو له مخې، یاد پیښه د شپې داسې مهال شوې چې د تګ لپاره یوه نامناسبه، له اندازې ډېره ډکه او د ژغورنې له وسایلو بېبرخې کښتۍ د فرانسې او بریتانیا ترمنځ اوبو کې وخوځېده.
ددې پېښې په قربانیانو کې نارینه، ښځې او ماشومان شامل وو او یوازې دوه کسان ژغورل شوي وو.
چارواکي وايي، دا پېښه د انساني قاچاق د شبکو د فعالیتونو او د ناقانونه کډوالۍ د هڅو پایله وه.
