د خیبر ټرانسپورټ اتحادیې افغانستان ته د باروړنکو موټرو تګ راتګ د احتجاج په توګه درولي
د خېبر ټرانسپورټ اتحادیې د احتجاج په توګه افغانستان ته د کډوالو د لېږد لپاره د هر ډول موټرو تګ راتګ درولی دی. د اتحادیې مسولین وايي، دا پرېکړه یې په افغانستان کې د بندو موټرو په غبرګون کې کړې چې له نهو میاشتو درول شوي.
د ټرانسپورټ مالکانو په وینا، اړوند چارواکي باید د دوی ۱۶۰۰ موټرو د ستونزې د حل لپاره بېړني ګامونه پورته کړي، که نه د احتجاج لړۍ به نوره هم پراخه کړي.
دوی زیاتوي چې، سره له دې چې تېره اوونۍ د پېښور د کمېشنر ریاض محسود په مشرۍ د افغانستان د قونسلګرۍ له استازو سره جرګه شوې وه او پکې پرېکړه شوې وه چې د جون له ۱۱مې نېټې څخه به په افغانستان کې بندو پاتې پاکستاني بار وړونکي موټرو ته د تورخم له لارې د بېرته ستنېدو اجازه ورکول کېږي، خو تر اوسه دغه پرېکړه نه ده عملي شوې.
د ټرانسپورټرانو په وینا، د ټرکونو چلوونکي او مالکان له سختو مالي ستونزو سره مخ دي، ځکه د ډېرو کورنیو یوازینۍ د عاید سرچینه همدا موټرې دي او د اوږدې مودې بندښت له امله یې اقتصادي وضعیت زیانمن شوی دی.
