ټرمپ ویلي له مودي، پوتین او زېلېنسکي سره یې ډېرې ښې خبرې کړې دي
د امریکا ولسمشر ډونالډ ټرمپ ویلي، چې د فرانسې په اویان-له-بېن ښار کې د جي۷ سرمشریزې په څنډه کې یې د هند له لومړي وزیر نرېندرا مودي، د روسیې له ولسمشر ولادیمیر پوتین او د اوکراین له ولسمشر ولادیمیر زېلېنسکي سره جلا جلا لیدنې او خبرې کړې دي.
ټرمپ د چارشنبې په ورځ خبریالانو ته وویل، له مودي سره یې «ډېرې ښې» خبرې کړې دي او دواړه هېوادونه د سوداګریزو تړونونو پر جوړولو کار کوي.
هغه مودي «سخت مرکچي» وباله او ویې ویل چې په راتلونکي کې به هند ته سفر وکړي.
دواړو مشرانو د سوداګرۍ، تعرفو او دوه اړخیزو اړیکو ترڅنګ د خلیج په سیمه، په ځانګړې توګه د هرمز تنګي په مسیر کې د هندي سمندري کارکوونکو پر خوندیتوب هم خبرې وکړې.
مودي ټرمپ ته وویل چې د نړۍ په بېلابېلو سمندري لارو کې، د هرمز تنګي په ګډون، سلګونه زره هندي سمندري کارکوونکي فعالیت کوي او د هغوی امنیت د نوي ډیلي لپاره خورا مهم دی.
هغه د امریکا او ایران ترمنځ د سولې هوکړې ته په اشارې سره هیله څرګنده کړه چې د دې هوکړې د عملي کېدو پر مهال به د سمندري کارکوونکو د خوندیتوب موضوع ته ځانګړې پاملرنه وشي.
ټرمپ هم د هندي سمندري کارکوونکو پر وژل کېدو خواشیني څرګنده کړه او ویې ویل چې امریکا به د هند امنیتي ملاتړ ته دوام ورکړي.
بل لور ته، ټرمپ ویلي چې د روسیې له ولسمشر ولادیمیر پوتین او د اوکراین له ولسمشر ولودیمیر زېلېنسکي سره یې هم مثبتې خبرې کړې دي.
