د سروبي اوسېدونکي: په سروبي کې دوه قبیلې د یوه زیارت د ملکیت پر سر په شخړه کې دي
د کابل ولایت د سروبي ولسوالۍ یو شمېر اوسېدونکو افغانستان انټرنشنل پښتو ته ویلي، چې د دینارخېلو او خواجهخېلو قومونو ترمنځ د شپولي بابا د زیارت پر سر پخوانۍ شخړه یو ځل بیا توده شوې او د سیمې خلک د احتمالي تاوتریخوالي په اړه اندېښنه لري.
یو شمېر شکایت کوونکو افغانستان انټرنشنل پښتو ته ادعا کړې، چې د سروبي ولسوالۍ د امر بالمعروف مسوول خان ولي په دې قضیه کې بېطرفي نه ده ساتلې.
دوی همداراز ادعا کوي، چې نوموړي د قضیې له یوه لوري مالي ګټه ترلاسه کړې ده.
د دینارخېلو قوم مشرانو او اوسېدونکو ادعا کړې، چې د یاد زیارت د دم، دعا او خدمت حق له شاوخوا څلور سوه کلونو راهیسې له دوی سره دی او دغه دود یې په دوامداره توګه ساتلی دی.
دوی وایي، په وروستیو کې د دې موضوع پر سر اختلافات زیات شوي او د دواړو قومونو ترمنځ اړیکې ترینګلې شوې دي. د دوی په وینا، که موضوع په بېپرې ډول ونه څېړل شي، د شخړې د پراخېدو احتمال شته.
د سیمې اوسېدونکو د طالب له اړوندو حکومتي ادارو، امنیتي مسوولینو او عدلي او قضایي ارګانونو غوښتي چې د موضوع په اړه بېپرې، شفافه او عاجله څېړنه ترسره کړي، د دواړو لورو خبرې واوري او د قانون او عدالت له مخې پرېکړه وکړي، څو د احتمالي تاوتریخوالي او شخړو مخه ونیول شي.
د یادونې وړ ده چې دا یوازې د سروبي د یو شمېر اوسېدونکو روایت دی، افغانستان انټرنشنل پښتو په خپلواکه توګه دا نه تاییدوي.
