د خیبر پښتونخوا جنوبي وزیرستان ولسوالۍ کې اوسېدونکي وايي، له تېرو دوو میاشتو راهیسې د ګرځنده انټرنېټي خدمتونو بشپړ بندښت د زدهکوونکو، سوداګرو او عامو خلکو ورځنی ژوند له جدي ستونزو سره مخ کړی دی.
د سیمې د اوسېدونکو په وینا، د برمل او واڼه په ګڼو سیمو کې ګرځنده انټرنېټ پرې شوی او زرګونه کسان له اړیکو او ډیجیټلي خدمتونو بېبرخې شوي دي.
د راپور له مخې، د برمل په تحصیل کې اعظم ورسک، کلوټۍ، لنډي دوګ، جي خېل سټاف، شین ورسک او نرګسي، او د واڼه په تحصیل کې غوه خواه، زېري نور، دژه غونډۍ او کري کوټ هغه سیمې دي چې اوسېدونکي یې د انټرنېټ له اوږدمهاله بندښت سره مخ دي.
ځايي اوسېدونکي وايي، انټرنېټ د معاصر ژوند یوه اساسي اړتیا ګرځېدلې او د دې خدمت دوامدار بندښت د خلکو ورځني کارونه او اړیکې اغېزمنې کړې دي.
زدهکوونکو ویلي چې د انټرنېټ نشتون د هغوی پر زدهکړو ناوړه اغېز کړی دی. د هغوی په وینا، انلاین درسي موادو ته لاسرسی، څېړنې، له ښوونیزو بنسټونو سره اړیکې او د ازموینو چمتووالی له ستونزو سره مخ شوي دي.
سوداګرو هم شکایت کړی چې د انټرنېټ بندښت د دوی سوداګریز فعالیتونه ټکني کړي دي. د دوی په وینا، انلاین بانکداري، برېښنايي راکړه ورکړه، له پېرېدونکو او عرضه کوونکو سره اړیکې او د بازار معلوماتو ته لاسرسی د انټرنېټ له لارې ترسره کېږي.
یو شمېر سوداګر وايي، اړ دي چې د انټرنېټ د ترلاسه کولو لپاره لرې سیمو ته سفر وکړي څو خپلې اړینې راکړې ورکړې او سوداګریزې چارې پر مخ یوسي.
ځايي ځوانان او ټولنیز فعالان وايي، د انټرنېټ بندښت د خلکو معلوماتو ته لاسرسی محدود کړی او له ملي او نړیوالو پرمختګونو سره یې د سیمې د اوسېدونکو اړیکه کمزورې کړې ده.
د سیمې خلکو له پاکستاني فدرالي حکومت، د پاکستان د مخابراتو ادارې او نورو اړوندو بنسټونو غوښتي چې ژر تر ژره د ګرځنده انټرنېټ خدمتونه بېرته فعال کړي.
