د ازبکستان امنیتي ادارې وايي، چې له افغانستان څخه یې دغه هېواد ته د یوې سترې اندازې نشهيي توکو د قاچاق هڅه شنډه کړې ده. ددغو ادارو په وینا، په سرخاندریا ولایت کې څه باندې ۳۷،۶ کیلوګرامه نشهيي توکي نیول شوي دي.
د ازبکستان د امنیتي ادارې د مطبوعاتي دفتر د معلوماتو له مخې، ددغه هېواد امنیتي ځواکونو ته معلومات رسېدلي وو چې له افغانستان څخه ازبکستان ته د نشهيي توکو یوه جوپه لېږدول کېږي.
د یادې ادارې په وینا، قانون پلي کوونکو ادارو دغه لېږد تر څار لاندې نیولی و او د قاچاقبرانو ټوله لاره یې تعقیب کړې وه.
د یادې ادارې په رپوټ کې راغلي، چې د عملیاتو په پایله کې، د سمرقند په ښار کې دوه ازبکستاني وګړي، چې عمرونه یې ۳۶ او ۲۸ کاله وو، د نشهيي توکو د ترلاسه کولو پر مهال ونیول شول.
دغه بار، چې ۲۵،۴ کیلوګرامه تاریاک او ۱۱،۹ کیلوګرامه چرس پکې شامل وو، دوی ته د دوو بهرنیو قاچاقبرانو له خوا سپارل شوی و چې عمرونه یې ۳۲ او ۳۰ کاله وو.
دغه اداره زیاتوي چې په یوه بل عملیات کې، د ترمذ په نړیوال سوداګریز مرکز کې دوه افغان وګړي، چې ۷۰ او ۲۴ کاله عمرونه یې لرل، ونیول شول. دوی هڅه کوله چې ۱،۸ کیلوګرامه تاریاک د ۵ زره امریکايي ډالرو په بدل کې وپلوري.
د دواړو پېښو په تړاو د نشهيي توکو د قاچاق او ناقانونه راکړې ورکړې په تور جنايي دوسیې ثبت شوې دي. نیول شوي کسان تر توقیف لاندې دي او څېړنې روانې دي.
