د امریکا عدلیې وزارت اعلان کړی چې ۳۰ کلن افغان وګړی رحمان الله لکڼوال، چې د تېر کال په نومبر میاشت کې سپینې ماڼۍ ته نږدې د ملي ګارډ پر سرتېرو یې وسلهوال برید وکړل، د فډرالي محکمې له خوا له ۱۷ نویو تورونو سره مخ شوی دی.
د امریکا څارنوالې جینین فیرس پیرو ویلي، لکڼوال تورن دی چې د لوېدیځ ورجینیا د ملي ګارډ ۲۰ کلنه سرتېره سارا بیکسټروم یې په قصدي ډول وژلې او بل سرتېری انډریو وولف یې سخت ټپي کړی دی.
د محکمې د اسنادو له مخې، لکڼوال له واشنګټن ایالت څخه تر پلازمېنې واشنګټن ډي سي پورې سفر کړی و او له ځان سره یې یوه غلا شوې وسله لېږدوله.
راپور زیاتوي چې د ۲۰۲۵ کال د نومبر په ۲۶مه هغه د فاراګټ وېسټ مېټرو سټېشن ته نږدې پرته له کومې پارونې پر ملي ګارډ سرتېرو ډزې وکړې، چې له امله یې سارا بیکسټروم او انډریو وولف د سر په برخه کې ولګېدل. دوه نورو ملي ګارډ سرتېرو بریدګر مهار کړی و.
پلټونکو د پېښې له ځایه د «سمېت اېنډ وېسن» ۳۵۷ ډوله توپانچه ترلاسه کړې چې په ۲۰۲۳ کال کې د سیټل ښار څخه غلا شوې وه.
سارا بیکسټروم، چې د لوېدیځ ورجینیا د ملي ګارډ غړې وه، د ټپونو له امله د شکرانې ورځې پر مهال مړه شوه، خو ۲۵ کلن انډریو وولف لا هم د خپلو ټپونو درملنه کوي.
امریکايي چارواکو ویلي چې د نوو تورونو له مخې، د بیکسټروم د وژنې قضیه د اعدام سزا وړ ګرځېدلې او د عدلیې وزارت ځانګړې کمېټه به پرېکړه وکړي چې ایا په دې قضیه کې د اعدام غوښتنه وکړي که نه.
عدلیې وزارت ټینګار کړی چې ټول تورونه تر اوسه ادعاوې دي او رحمان الله لکڼوال به تر هغې بېګناه ګڼل کېږي، څو چې جرم یې په محکمه کې ثابت نه شي.
