انډپېنډنټ خبري شبکې راپور ورکړی، چې د پاکستان د سویلي وزیرستان په واڼه سیمه کې تر ۱۸ کلونو وروسته یو ځل بیا د تحریک طالبان پاکستان (ټيټيپي) پر ضد شاوخوا ۶۰۰ کسیز قومي لښکر جوړ شوی او د سیمې په بېلابېلو برخو کې یې مورچې نیولې دي.
د راپور له مخې؛ دغه لښکر د توجیهخېل قوم د مشر ملک جمیل خان په مشرۍ رامنځته شوی او د سیمهییزې ادارې او پولیسو ملاتړ هم ورسره شته. په واڼه کې وروستی ځل په ۲۰۰۷کال کې د ازبک وسلهوالو، طالبانو او نورو بهرنیو جنګیالیو پر ضد قومي لښکر جوړ شوی و، چې له یادې سیمې د وسلهوالو په اېستلو کې یې مهم رول لوبولی و.
ځايي سرچینې وايي، په وروستیو کلونو کې د ټيټيپي وسلهوال یو ځل بیا د واڼه او شاوخوا سیمو بېلابېلو برخو ته ستانه شوي او خپل فعالیتونه یې پراخ کړي دي. د دوی په وینا؛ وسلهوالو نه یوازې په غرنیو سیمو کې حضور درلود، بلکې په تېرو دوو کلونو کې یې په مېشتو سیمو کې هم فعالیتونه زیات کړي دي.
د سیمې اوسېدونکي ادعا کوي، چې وسلهوال له خلکو څخه د پیسو غوښتنې کوي او د نه ورکولو په صورت کې یې تښتوي.
د پاکستان د فامي اسمبلۍ غړي زبیر خان ویلي، د ټيټيپي د فعالیتونو له امله د سیمې سوداګري او ښوونیزې چارې اغېزمنې شوې دي. هغه ادعا کړې، چې وسلهوالو ترې د یوې سترې مالي اندازې غوښتنه کړې وه او د نه منلو وروسته یې ورور تښتولی و.
د راپور له مخې؛ څو میاشتې وړاندې ملک جمیل خان په یوه قومي جرګه کې اعلان کړی و، چې وسلهوال یوازې د حکومت نه؛ بلکې د ټولې سیمې لپاره ګواښ ګرځېدلي او پر ضد یې باید اقدام وشي.
وروسته پر ملک جمیل خان او د هغه پر کورنۍ څو بریدونه وشول. په دغه بریدونو کې د هغه درې زامن ووژل شول، چې له امله یې په توجیهخېل قوم کې پراخ غبرګونونه راوپارېدل.
سرچینې وايي، تر دغه پېښو وروسته د سیمې مشرانو د جوماتونو له لارې اعلانونه وکړل او سلګونه کسان د کډيکوټ سیمې ته ورټول شول. ورپسې ۶۰۰ کسیز قومي لښکر جوړ شو او د سیمې په مهمو ځایونو کې یې د امنیت لپاره ګزمې او څارنه پیل کړه.راپور زیاتوي، له هغه وخت راهیسې د قومي لښکر او ټيټيپي وسلهوالو ترمنځ وخت ناوخت نښتې هم روانې دي.
