یو افغان کډوال ویلي، چې د چهارشنبې په ورځ د ایران - ترکیې پر پوله په وان سیمه کې ۹۵ افغان پناهغوښتونکي د ترکیې د پولیسو له لوري وهل شوي دي. نوموړي افغانستان انټرنشنل ته په لېږلې ویډیو کې زیاته کړې، چې د پولیسو د تاوتریخوالي له امله یوشمېر کډوال سخت ټپیان شوي دي.
په دغه لېږلې ویډیو کې په یوه خونه کې ۱۲ افغان کډوال لېدل کېږي، چې پر سر او لاسونو یې ټپونه دي او وايي چې د ترکیې پولیسو وهلي دي. په ویډیو کې نور وضاحت نهدی ورکړل شوي، چې دغه کسانو په کومو لارو ترکیې ته د تګ هڅه کوله؛ خو زیات مهال له دغه لارو یوشمېر کسان هڅه کوي، چې په قاچاقي توګه ترکیې ته ولاړ شي.
تر دې وړاندې هم د ایران او ترکیې پر پوله د ترکي پوله ساتو ځواکونو لهخوا له افغان وګړو سره د تاوتریخوالي ورته قضیې راپور شوې وې. د افغانستان انټرنشنل څېړنه ښيي، هغه کډوال چې د ۱۴۰۰کال تر بدلونونو وروسته د بېوزلۍ، بېکارۍ او پراخو بشري حقونو سرغړونو له امله له افغانستان نه تښتیدلي وو، د ایران او ترکیې پر لاره له سخت تاوتریخوالي سره مخ شوي دي.
د پوله ساتو لهخوا تاوتریخوالی، یرغمل نیونه او د لارې په اوږدو کې طبیعي پېښې په ځینو مواردو کې د کډوالو د مړینې لامل شوي دي. ترکي چارواکو لاتراوسه د دغه ادعاوو په اړه څه نهدي ویلي.
