د ښځو تر نیولو وروسته؛ د هرات یوه اوسېدونکې وایي له دوو اونیو راهیسې له کوره نهدي وتلي
د هرات یوې اوسېدونکې افغانستان انټرنشنل ته ویلي، چې د طالبانو لهخوا د ښځو تر نیولو وروسته د دغه ولایت په بېلابېلو برخو کې د وېرې فضا خوره شوې ده. د هغې په وینا؛ د نیول کېدو له وېرې له تېرو دوو اونیو راهیسې دوی له کوره بهر نهدي وتلي.
هغه وایي: «دوه اونۍ کېږي، چې موږ نجونې د وېرې له امله په خپلو کورونو کې بندې یو او نهشو کولی بهر ووځو. ایا دا زموږ حق دی؟ ولې ټول محدودیتونه د افغان ښځو لپاره دي؟»
نوموړې طالبانو ته په خطاب ویلي، چې ولې د نجونو نیول او سپکول د حجاب لپاره د خپلې خوښې حل ګڼئ؟ هغې زیاته کړې: «ایا دا د یوې نجلۍ حق دی، کله چې بازار ته د اړتیا وړ توکو ترلاسه کولو لپاره ځي؛ نو طالبان یې په لاره کې دروي او پرته له کومې ګناه یې نیسي؟»
هغې وړاندې پوښتنه کړې، ایا دا د افغان ښځو حق دی چې د دوی ټولې هیلې او عزت په یوه ورځ لهمنځه یوړل شي؟ ایا نجونو ته سپکاوی د طالبانو غیرت دی؟ هغه وایي: «موږ هیڅکله دا نهدي ویلي، چې غواړو بېحجابه اوسو».
