د پاکستان ستره محکمه له عمران خان سره پر ملاقات د بندیز په اړه د عریضو اورېدنه کوي
د پاکستان ستره محکمه به نن (پنجشنبه) هغه عریضې واوري، چې د تحریک انصاف ګوند له بنسټګر او پخواني لومړي وزیر عمران خان سره د هغه د وکیلانو، شخصي ډاکټرانو او کورنۍ غړو پر ملاقات د بندیز په تړاو ثبت شوې دي.
د راپورونو له مخې؛ د قاضي محمدعلي مظهر په مشرۍ درې کسیزه قضايي جرګه چې قاضي مسرت هلالي او قاضي شاهد بلال حسن هم پهکې شامل دي، د تحریک انصاف د عمومي منشي سلمان اکرم راجا او د عمران خان د خور عظمی خان عریضو ته به رسېدنه وکړي.
سلمان اکرم راجا د اسلاماباد سترې محکمې د ۲۰۲۵کال د اکتوبر د ۲۳مې نېټې هغه پرېکړه ننګولې، چې په اډیاله زندان کې له عمران خان سره د وکیلانو د لیدنې په اړه د محکمې د لارښوونو د نه عملي کېدو په تړاو یې عریضه رد کړې وه.
بلخوا ډاکټر عظمی خان هم د اسلاماباد سترې محکمې د هغې پرېکړې پر ضد عریضه کړې، چې پهکې د شفا نړۍوال روغتون ته د عمران خان د لېږد، د شخصي ډاکټرانو، کورنۍ او وکیلانو د لاسرسي او د هغه د روغتیايي معلوماتو د شریکولو غوښتنې رد شوې وې.
په عریضه کې ویل شوي، چې ډاکټر عظمی خان د عمران خان نږدې خپلوانه ده او د ډاکټرې په توګه د هغه د روغتیايي وضعیت په اړه اندېښنه لري. نوموړې ادعا کړې، چې د زندان اداره له عمران خان سره د هغه د ډاکټرانو او د کورنۍ غړو د لیدنې اجازه نه ورکوي.
دغه اورېدنه وروسته له هغې ترسره کېږي، چې د پاکستان لوی قاضي یحیی اپریدي د مئ میاشتې پر ۲۰مه سلمان اکرم راجا ته ډاډ ورکړی و چې د عمران خان د ډاکټرانو، وکیلانو او کورنۍ د لاسرسي اړوند عریضې به له لوی اختر وروسته واورېدل شي.
