د امریکا او ایران تر هوکړې وروسته د تېلو بیې راټیټې شوې
د امریکا او ایران ترمنځ د تفاهم لیک تر لاسلیک وروسته د تېلو بیې راټیټې شوې او د انرژۍ رسولو د خنډونو په اړه یې اندېښنې کمې کړې دي. د راپور له مخې؛ د برنېټ خامو تېلو بیه ۲.۲ سلنه راکمه شوې او د هر بېرل بیه ۷۷.۷ ډالرو ته رسېدلې ده.
راپورونه ښیي، چې د وېسټ ټېکساس انټرمېډیټ (WTI) خامو تېلو بیه هم ۲.۵ سلنه کمه شوې او د هر بېرل بیه ۷۴.۸ ډالرو ته راښکته شوې ده. شنونکي نړۍوال بازار ته د ایران د تېلو د بېرته ستنېدو لپاره د تمو زیاتوالی او په هرمز تنګي کې د کښتیو تګراتګ عادي کېدل د تېلو بیو د کمښت لامل یاد کړ.
د دوی په باور؛ کله چې د انرژۍ د عرضې کمښت یا د سمندري لارو د بندېدو اندېښنې کمې شي، نو په نړۍوال بازار کې د تېلو بیې هم راټیټېږي.
