د پاکستان د بشري حقونو کمېسیون په خيبرپښتونخوا کې د دوو سېکانو وژنه په کلکه غندلې ده
د پاکستان د بشري حقونو کمیسیون د خيبرپښتونخوا د مردان ولسوالۍ په یوه درمسال (ګوردواره) کې د دوو سېکانو وژل چې د راپورونو له مخې د دغه ځای ساتونکي وو، په کلکه غندلي دي.
د پاکستان د بشري حقونو کميسيون د جمعې په ورځ (د غبرګولي ۲۹مه) د یوې اعلامیې په خپرولو سره وويل، دا پېښه نه یوازې د مذهبي لږکیو او د هغوی د عبادت ځایونو د خوندیتوب او امنیت په اړه جدي اندېښنې راپورته کوي، بلکې د هغو شرایطو په اړه هم پوښتنې راولاړوي چې دا برید پهکې شوی دی.
په اعلامیه کې راغلي: «ښيي تورن بریدګر چې په دغه ځای کې د امنیت په ټینګولو بوخت وو، ځانګړې څېړنې ته اړتیا لري او د مذهبي لږکیو د خوندیتوب په اړه د سترې محکمې د ۲۰۱۴ کال د پرېکړې په پلي کولو کې د لا پیاوړي غوراوي او څارنې د میکانیزمونو اړتیا په ګوته کوي».
د پاکستان د بشري حقونو کمیسیون د مردان د پولیسو د مشر پر هغو عامه څرګندونو هم اندېښنه ښودلې، چې دا پېښه یې په لومړیو پړاوونو کې شخصي دښمني بللې وه.
د تېرې چهارشنبې په ورځ د مردان پوليسو ويلي وو، چې په بابو محله ګنج بازار سيمه کې ناپېژاندو وسلهوالو په درمسال کې دننه ښځه او مېړه (اساونتي ښځه او جګنات مېړه) په ډزو سره وژلي وو.
د مردان د پوليسو مشر مسعود احمد د جمعې په ورځ له رسنیو سره خبرو کې وويل، په پېښه کې تورن کس شېرشاه نيول شوی او په لومړنیو څېړنو کې له کومې ناقانونه يا ترهګرې ډلې سره د هغه د اړيکو په تړاو تر اوسه کره شواهد نهدي ترلاسه شوي.
هغه زیاته کړې، تورن کس هم په لومړنیو پوښتنو کې د پېښې په تړاو خپل شخصي دريځ څرګند کړی، خو په وینا یې پولیس به خپلو څېړنو ته دوام ورکړي.
