د تخار پوهنتون یوه محصل افغانستان انټرنشنل ته په رالېږلي پیغام کې ادعا کړې چې د تیرې چهارشنبې په ورځ، یو شمېر محصلان د خولۍ نه لرلو له امله د پوهنتون د طالب ساتونکو له خوا نیول شوي او د دغو ځواکونو استوګنځي ته لېږدول شوي دي.
دغه زدهکوونکي ویلي چې دا پېښه یې په خپلو سترګو لیدلې او د پوهنتون ګڼ نور محصلان هم شاهدان دي.
د نوموړي په وینا، له ځینو محصلانو سره چلند یوازې تر نیولو محدود نه و، بلکې سپکاوي کوونکي الفاظ هم ورته کارول شوي دي.
هغه ادعا کړې چې یو شمېر محصلان له فزیکي تاوتریخوالي سره هم مخ شوي او وهل شوي دي.
د یادونې وړ ده چې دا یوازې د تخار پوهنتون د یوه زده کوونکي روایت دی، افغانستان انټرنشنل- پښتو یې په خپلواکه توګه نه تاییدوي.
