له پاکستان نه اېستل شوي کډوال: د وهلو او بندیانولو ترڅنګ پولیسو له موږ پیسې هم اخیستې
له پاکستان نه اېستل شوي افغان کډوال وايي، چې پاکستاني پولیسو ان د اېستلو په وروستیو ورځو کې هم ځورول او پر وړاندې یې له «ظلم» کار اخیستی دی. دغه کډوال وايي، چې د وهلو او بندیانولو ترڅنګ پولیسو پیسې هم ترې اخیستې دي.
افغانستان ته د تازه ستنو شویو افغان کورنیو له ډلې د امیرخان او محمد اغا په نوم دوو ستنو شویو افغانانو افغانستان انټرنشنل ته ویلي، چې پاکستاني پولیسو افغان کډوال سخت ځورول.
دوی زیاته کړې: «پولیس به پرلهپسې ډول راتلل موږ به یې تنګولو؛ خو د راتګ پرمهال یې زموږ سره شخړه شوه او موږ یې ووهلو او بنديان یې کړو». په تورخم کې د محمد اغا په نوم یو افغان کډوال وايي: «پولیسو د لارې په اوږدو کې له هر کس څخه نږدې ۴زره روپۍ اخیستې دي».
تر دې وړاندې افغانستان ته ستنو شویو کورنیو هم په پاکستان کې د پولیسو له ناوړه چلنده شکایت کاوه. د کډوالو ملاتړو بنسټونو په وار، وار له دغه هېواده غوښتي، چې د کډوالو د اېستلو پرمهال د بشري حقونو اصولو ته په پام عمل وکړي.
