د طالبانو د دارلعلوم یوې زدهکوونکې افغانستان انټرنشنل پښتو ته په رالېږلي یو پیغام کې ویلي، چې په کتابونو کې راغلي د ښځو اړوند موضوعات د ښوونکو لهخوا نه تدریس کېږي او له دوی غواړي دغه پاڼه واړوي او له لوستلو یې ډډه وکړي.
هغه وایي، ځینې موضوعات یا په بشپړ ډول نه تدریسېږي او یا هم تر سانسور لاندې راځي. دغه زدهکوونکې وایي، په یوه درس کې چې د دري ژبې د مضمون برخه و او عنوان یې «په اسلام کې د ښځې مقام» و؛ استاد زدهکوونکو ته ویلي چې د کتاب هغه پاڼه واړوي، ځکه دغه برخه نه تدریس کېږي.
هغې په خپل پیغام کې ویلي، چې د یادې پېښې له لیدو وروسته ډېره حیرانه شوې او دا یې د طالبانو د تګلارو له ښځو سره د چلند یوه ښکاره بېلګه بللې ده. د هغې په وینا؛ دغه موضوع پر هغې ژور اغېز کړی او له هماغه ورځې وروسته یې دارالعلوم ته له تګ څخه ډډه کړې ده.
دغه زدهکوونکې زیاتوي، چې له مجبورۍ دارالعلوم ته ځي؛ ځکه د زدهکړو لپاره بله هېڅ لاره ورته نهده پاتې. هغه وایي، چې یوازې د څو دیني زدهکړو لپاره دارالعلوم ته تلله؛ خو اوس د دغه ډول محدودیتونو او د ښځو پر وړاندې د تګلارو له امله له زدهکړو زړه توری شوې ده. هغه وایي، حیرانه ده چې څنګه د اسلام په چوکاټ کې د ښځو د حقونو تشریح شوې موضوع ورته نه تدریسېږي.
دا په داسې حال کې ده، چې د طالبانو له بیا واکمنېدو وروسته ځینې هغه مضامین چې یاده ډله یې د خپلو پالیسیو خلاف ګڼي؛ له درسي نصاب څخه اېستل شوي دي. راپورونه ښيي، طالبانو له عمومي کتابتونونو هم هغه کتابونه ټول کړي چې د دوی د اېډیالوژۍ خلاف دي.
نیوکه کوونکي دغه کړنې د خلکو له پوهې د طالبانو ډار ګڼي او وایي، طالبان ځکه کتابونه لوستلو ته نه پرېږدي چې نوی نسل د طالب غیر اصولي کړنې تحلیل نهکړي.
