جاپان د هرمز تنګي له لارې د خپلې لومړۍ تېل وړونکې بېړۍ د خوندي تېرېدو خبر ورکړی
د جاپان د بهرنیو چارو وزارت خبر ورکړی، چې د یوه جاپاني شرکت اړوند تېل وړونکې بېړۍ له هرمز تنګي څخه په خوندي ډول تېره شوې او له فارس خلیج نه وتلې ده. د یاد وزارت په خبرپاڼه کې راغلي، چې دغه بېړۍ په فارس خلیج کې د جګړې له امله درېدلې وه او اوس د جاپان په لور خوځېدلې ده.
د جاپاني چارواکو په وینا؛ د توکیو حکومت د یاددې بېړۍ د خوندي تېرېدو لپاره له ایران سره همغږي کړې وه. د بېړۍ مالک شرکت ویلي، چې یاده تېل وړونکې بېړۍ د لایبریا تر بېرغ لاندې تګراتګ کوي او د جاپاني شرکت «کیویي ټانکر» پورې اړه لري.
د جاپان د بهرنیو چارو وزارت زیاته کړې، ټولې هغه بېړۍ چې له دغه هېواد سره تړاو لري او جاپاني عمله پهکې سپره وه؛ اوس له فارس خلیج نه وتلې ده. د جاپان لومړۍ وزیرې سانای تاکایچي پر اېکس پاڼه کاږلي، چې د امریکا او ایران ترمنځ د هوکړې تر لاسلیک وروسته به د جاپان حکومت په هرمز تنګي کې د بېړیو د ازاد او خوندي تګراتګ د ژر پیلېدو لپاره خپلو ډیپلوماتیکو هڅو ته دوام ورکړي.
هغې همداراز ویلي، چې لاهم ۳۷ جاپاني بېړۍ له هرمز تنګي د تېرېدو په تمه دي.
