د امریکا د کورني امنیت وزارت: د څه باندې یو میلیون ډالرو د درغلۍ په تور ۱۵ کسان ونیول شول
د امریکا د کورني امنیت وزارت اعلان کړی دی چې د دغه هېواد د عدلیې وزارت ۱۵ کسان د څه باندې ۱،۴ میلیونه ډالرو د مالي درغلۍ په یوه قضیه کې تورن کړي دي. په دغو کسانو کې ۱۱ تنه داسې کډوال شامل دي چې په ناقانونه توګه امریکا ته داخل شوي وو.
د دغه وزارت په وینا، دا قضیه د کورني امنیت د پلټنو ادارې د اسنادو او امتیازاتو د درغلۍ ضد کاري ډلې له خوا افشا شوې ده.
د امریکا د کورني امنیت وزارت زیاته کړې، دغه ۱۱ ناقانونه کډوال به له عدلي بهیر او محاکمې وروسته ژر له امریکا واېستل شي، څو د امریکا مالیه ورکوونکي بیا له درغلۍ سره مخ نه کړي.
امریکايي چارواکو د دې درغلۍ د څرنګوالي او د تورنو کسانو د هویت په اړه نور جزییات نه دي ورکړي.
