قالیباف، خامنهيي ته منسوب پیغام له امریکا سره د خبرو اترو د دوام لپاره یو چوکاټ وباله
د ایران د پارلمان مشر محمد باقر قالیباف په یوه پیغام کې مجتبی خامنهیي ته په خطاب له امریکا سره د تفاهملیک په اړه د هغه د «پیغام» هرکلی کړی دی. هغه ویلي، دغه پیغام ښیي چې د تفاهملیک په وروستي کېدو «یوه ستونزمنه او پېچلې لاره» په مخکې ده.
د ایران د پارلمان مشر د خپل پیغام په بله برخه کې مذاکرات «د مبارزې له ډګرونو څخه یو ډګر» بللی او زیاته کړې یې ده، که مقابل لوری د «زیاتې غوښتنې» هڅه وکړي؛ نو ایران به ورته مناسب ځواب ورکړي.
هغه همدارنګه ټینګار کړی، چې ایراني چارواکي د مذاکراتو په بهیر کې د ټاکل شویو «شرطونو او سرو کرښو» د څار او ساتنې لپاره ځانونه ژمن بولي. دغه څرګندونې وروسته له هغې شوې، چې مجتبی خامنهيي ته منسوب یو متن خپور شو.
دغه «پیغام» داسې مهال خپور شوی، چې مجتبی خامنهيي د وروستۍ جګړې له پیل راهیسې په عامه محضر کې نهدی لیدل شوی او تراوسه یې کوم نوی انځور، غږیز پیغام یا ویډیويي پیغام هم نهدی خپور شوی.
