د بشري حقونو کمېسیون: د افغان کډوالو جبري ستنول د بشري حقونو له اصولو سره په ټکر کې دي
د پاکستان د بشري حقونو کمېسیون د کډوالو نړیوالې ورځې په مناسبت ویلي چې هېڅوک په خپله خوښه نه کډوال کېږي، بلکې جګړې، ځورونې، تاوتریخوالی او ناامني خلک اړ باسي چې خپل هېواد پرېږدي او خوندي ځایونو ته پناه یوسي. دغه کمېسیون د افغان کډوالو جبري ستنول غیرې قانوني بللي.
د دغه کمېسیون په اعلامیه کې راغلي چې د خوندیتوب غوښتل د هر انسان بنسټیز حق دی او کډوالو سره باید له تبعیض پرته په درناوي چلند وشي، خوندي وساتل شي او هغو حقونو او فرصتونو ته لاسرسی ولري چې د خپل ژوند د بیا رغولو لپاره ورته اړتیا لري.
کمېسیون د پاکستان له حکومت غوښتي چې د ۱۹۵۱ کال د کډوالو کنوانسیون او د ۱۹۶۷ کال پروتوکول لاسلیک کړي او د «نه جبري ستنولو» اصل ته درناوی وکړي، څو هېڅ کډوال په زور خپل اصلي هېواد ته ونه لېږدول شي.
د پاکستان د بشري حقونو کمېسیون ټینګار کړی چې د بشري اصولو له مخې باید کډوال د جبري ستنولو پر ځای د خوندیتوب او قانوني ملاتړ له حقونو برخمن شي.
