د افغانستان او قزاقستان د سوداګریز نندارتون او د B2B سوداګریزو غونډو په څنډه کې، د قزاقستان د لومړي وزیر مرستیال او د ملي اقتصاد وزیر سیریک ژومانګارین د طالبانو له پېښو سره د مبارزې ادارې ته د ۳۲۰ ټُنه بشري مرستو سند وسپاره. په دې مرستو کې خوراکي او غیر خوراکي توکي شامل دي.
د طالبانو له پېښو سره د مبارزې چمتووالي ادارې رييس نورالدین عزیزي په همدې تړاو جوړو شویو مراسمو کې د قزاقستان د بشردوستانه همکاریو له امله د مننې ترڅنګ وویل، چې دغه هېواد تل په سختو شرایطو کې د افغانستان د خلکو ترڅنګ پاتې شوی او همداراز یې ډاډ ورکړ، چې سپارل شوې مرستې به په شفاف او عادلانه ډول او پر وخت مستحقو کسانو او د پېښو له امله زیانمنو ته ووېشل شي.
د قزاقستان د لومړي وزیر مرستیال او د ملي اقتصاد وزیر سیریک ژومانګارین هم په دې مراسمو کې وویل، چې هېواد یې په څو پړاوونو کې د افغانستان خلکو ته بشري مرستې وړاندې کړي او زیاته یې کړه: «دغه مرستې نه یوازې د افغانستان له خلکو څخه د ملاتړ څرګندونه کوي، بلکې د دواړو هېوادونو ترمنځ د دوستانه اړیکو او یووالي نښه هم ده».
د طالبانو له پېښو سره د مبارزې چمتووالي ادارې د شنبې په ورځ (د غبرګولي ۳۰مه) د یوې خبرپاڼې په خپرولو سره زیاته کړې، چې په دغو مرستو کې ۳۰۰ ټنه بوره، ۱۰۰ بابه لس نفرې خېمې، ۱۰۰۰ تختې کمپلې، ۲۰۰۰ تختې روجایۍ، ۱۰۰۰ تختې توشکی سره د پوښونو، ۱۰۰۰ تختې بالښتونه او ۵۰۰۰ جوړې د نارینهوو ترجامو لاندې لباسونه شامل دي، چې له پېښو سره د مبارزې چمتووالي ادارې استازو د حیرتان په بندر کې د قزاقستان له سرکونسل څخه ترلاسه کړې دي.
د طالبانو د کورنیو چارو وزارت ویلي چې د قزاقستان د لومړي وزیر مرستیال سیریک ژومان ګارین د یادې ډلې د کورنیو چارو وزیر سراج الدین حقاني سره کتلي او دواړو لوریو د امنیتي وضعیت او د نشهيي توکو پر وړاندې د ګډې مبارزې په اړه خبرې کړې دي.
د طالبانو د کورنیو چارو وزارت د شنبې په ورځ، د غبرګولي ۳۰مه د یوې خبرپاڼې په خپرولو سره ویلي، چې داړو لوریو په یاده لیدنه کې د امنیت او نشهيي توکو پر ضد د ګډې مبارزې ترڅنګ د ټرانزیټ، ټکنالوژۍ، سیاسي اقتصادي اړیکو پراختیا او سیمهییزو همکاریو په اړه خبرې کړې دي.
په خبرپاڼه کې راغلي چې دواړو لوریو د سوداګرۍ پراختیا او پانګونې باندې ټینګار کړی دی.
د قزاقستان د لومړي وزیر مرستیال او د دغه هېواد د اقتصاد وزیر له حقاني سره تر لیدنې وړاندې د طالبانو د رییس الوزرا او ملا برادر سره هم جلا جلا لیدني کړي دي.
د افغانستان د ملي امنیت پخوانی رییس احمد ضیا سراج وایي، داسې راپورونه شته چې هند د بېپيلوټه الوتکو د جوړولو او پراختیا لپاره طالبانو ته لومړنۍ مرستې چمتو کړې دي. نوموړي پر پاکستان د طالبانو د بېپيلوټه الوتکو بریدونه بېاغېزې بللي دي.
افغانستان د ملي امنیت پخواني رییس د شنبې په ورځ، افغانستان انټرنشنل ته وویل:«طالبان ډېری وخت بېپيلوټه الوتکې له ازادو بازارونو څخه پېري او په هغو کې په لاسوهنې سره، د چاودیدونکو توکو د لېږد وړتیا ورزیاتوي.» سراج همداراز زیاته کړې: «نا تایید شوي راپورونه شته چې هند دا مهال د لومړنیو ظرفیتونو یوه برخه د طالبانو په واک کې ورکوي.»
ښاغلي سراج په دې اړه کوم سند او ثبوت نه دی وړاندې کړی.
تېره ورځ د طالبانو د دفاع وزارت اعلان وکړ چې د هوايي بریدونو په ترسره کولو سره یې د پاکستان په بلوچستان او خیبرپښتونخوا ایالتونو کې «د داعش ډلې پورې تړلي مرکزونه» په نښه کړي دي.
ښاغلی سراج وایي هغه وروستي بریدونه چې طالبان یې د پاکستان په بلوچستان ایالت کې د ترسره کولو ادعا کوي، یوازې د خلکو د «غولولو» او «داخلي فشارونو د کمولو» لپاره دي او له «تبلیغاتي کارونې» پرته یې بله هېڅ لاسته راوړنه نه درلوده.
په ورته مهال تېره ورځ د پاکستان د اطلاعاتو او خپرونو وزارت تایید کړه چې د دغه هېواد د هوايي ځواک دفاعي سيسټم د خیبر ولسوالۍ شینکو ته نږدې د «طالبانو» یوه ابتدایي بېپيلوټه الوتکه پېژندلې او نسکوره کړې ده. د دغه وزارت په وینا، دغه هوايي نفوذ په چټکۍ سره مهار شو او هېڅ زیان یا مرګژوبله یې نه ده اړولې.
پاکستان په وار وار طالبان د دغه هېواد د امنیت په خرابولو کې له هند سره په همکارۍ تورن کړي دي.
په دې وروستیو کې په هند کې د افغانستان انټرنشنل خبریال راپور ورکړ چې هند له پاکستان سره په جګړه کې د طالبانو د ټپیانو درملنه کوي. له پاکستان سره په سرحدي جګړه کې د طالبانو لږ تر لږه یو ټپي د هند پلازمینې ډیلي ته لېږدول شوی او تر درملنې لاندې دی.
په ډیلي کې د افغانستان انټرنشنل خبریال د جمعې په ورځ دغه طالب ټپي چې په اسانۍ سره یې نشو کولای وګرځي- په دغه ښار کې له خپلو دوو پایوازانو سره لیدلی دی.
د طالبانو د بېپیلوټه الوتکو د کارونې مخینه
د طالبانو له لوري له ډېر پخوا څخه د بېپیلوټه الوتکو کارولو ته په اشاره احمدضیا سراج ویلي چې دغې ډلې په ۲۰۱۹ او ۲۰۲۰ میلادي کلونو کې څو ځله د بېپيلوټه الوتکو په کارولو سره په لوګر، میدانوردګ، کندوز، تخار، پکتیا او بلخ ولایتونو کې پر پوستو، پوځي مرکزونو او حتی ملکي سیمو بریدونه کړي وو.
هغه وویل چې دا ټول بریدونه د خورا ابتدايي بېپيلوټه الوتکو په واسطه ترسره کېدل.
د ملي امنیت د پخواني رییس په وینا، دا بېپيلوټه الوتکې معمولا له ازادو بازارونو څخه د سوداګریزې کارونې تر پوښښ لاندې پېرل کېدې او په لږ لاسوهنې سره یې د دوه څخه تر څلورو کیلوګرامو پورې د چاودیدونکو توکو د لېږد وړتیا پیدا کوله.
هغه د دې وسلو د کارونې په تشریح کولو کې وویل: «دا بېپيلوټه الوتکې د تخریبي ځواک له نظره پر یوه کوچني هدف، که په سمه توګه عمل وکړي ګټور ثابتېدلی شي؛ خو په دغو بېپيلوټه الوتکو سره د یوه تروریستي مرکز په نښه کول په هېڅ صورت اغېزمن نه دي، پرته له دې چې د استخباراتي موخو او د ذهنونو د غولولو لپاره ورڅخه کار واخیستل شي.»
تر دې وړاندې هم طالبانو په اسلاماباد او راولپنډۍ کې د «نورخان» ستراتیژیکې هوايي اډې په ګډون، د بېپيلوټه الوتکو تر بریدونو لاندې راوستې وې.
د راپورونو له مخې، طالبانو پر افغانستان له واکمنېدو وروسته په کابل او ځینو ولایتونو کې د ځانمرګو او کشفي بېپيلوټه الوتکو د جوړولو او تولید لپاره کوچني ورکشاپونه او فابریکې جوړې کړې دي او هڅه کوي چې په سرحدي شخړو کې د خپل هوايي ځواک د کمښت د پوره کولو لپاره له دې وسیلې څخه د بدیل په توګه کار واخلي.
طالبانو په روان کال کې پر پاکستان د بېپیلوټه الوتکو ۱۲ بریدونه کړې دي
د «اکملډ» نړیوال سازمان معلومات چې د نړۍ جنګي پېښې او شخړې ثبتوي، ښيي چې افغان طالبانو د لومړي ځل لپاره د روان کال په فبرورۍ کې د پاکستان په وړاندې د خپل پوځي غبرګون د یوې برخې په توګه د بېپيلوټه الوتکو کارول پیل کړي دي.
د دغه نړیوال بنسټ د شمېرو له مخې، په فبرورۍ کې د دغه نوي پوځي تاکتیک له پیل راهیسې، د پاکستان په خاوره کې د طالبانو لخوا لږ تر لږه ۱۲ د بېپيلوټه الوتکو بریدونه ثبت او مستند شوي دي.
دا په داسې حال کې ده چې برېټانوي ورځپاڼې ډیلي مېل د ۱۴۰۴ کال په غبرګولي کې راپور ورکړ چې طالبان د ځانمرګو بېپيلوټه الوتکو د جوړولو په لټه کې دي؛ داسې بېپیلوټه الوتکې چې کولای شي د افغانستان له پولو هاخوا هدفونه په نښه کړي. په راپور کې راغلي چې دا بېپيلوټه الوتکې د کابل په څنډو کې په فونیکس کمپ کې جوړېږي. دا کمپ تر ۲۰۲۱ کال وړاندې د امریکايي ځواکونو اډه وه.
د طالبانو د کورنیو چارو وزارت وایي، د هرات د صنعتي ښارګوټي په دویم فاز او د جلال اباد ښار په لومړۍ ناحیې په سیمه کې د اورلګېدنې له امله شاوخوا ۲۰ میلیونه افغانۍ مالي زیان اوښتی دی. طالبانو ویلي، اوروژونکو د سوداګرو د ۶۵۰ میلیونه افغانیو په ارزښت شتمني له اوره ژغورلې ده.
د طالبانو د کورنیو چارو وزارت ویاند عبدالمتین قانع د یوې خبرپاڼې په خپرولو سره ویلي، دغه اورلګېدنه د شبنې په ورځ، د غبرګولي په ۳۰مه د سهار شاوخوا درې بجې د هرات د صنعتي ښارګوټي د دویم فاز په «نور اریا» فابریکه کې رامنځته شوې ده. د خبرپاڼې د معلوماتو لهمخې، دغه فابریکې د کاغذ او کارتن د تولید په برخه کې فعالت کاوه.
طالبانو تر اوسه د اورلګېدنې د لامل په اړه څه نه دي ویلي. تر دې وړاندې د هرات اوسېدونکو د صنعتي ښارګوټي له سیمې د لوګي د غټې ستنې د پورته کېدو خبر ورکړی و.
د طالبانو د کورنیو چارو وزارت همداراز ویلي، د جلالاباد ښار په لومړۍ ناحیه کې هم یوه بله اورلګېدنه شوې ده. د وزارت په وینا، په ننګرهار کې اوروژونکو د خلکو د یو میلیون افغانیو په ارزښت شتمني له اوره ژغورلې ده.
د ملګرو ملتونو د بشري مرستو د همغږۍ ادارې (اوچا) د کډوالو د نړۍوالې ورځې په مناسبت په افغانستان کې د راستنو شویو کډوالو د وضعیت په اړه اندېښنه ښودلې ده. د دغې ادارې د معلوماتو له مخې، له ۲۰۲۳ کال راهیسې له شپږ میلیونو څخه ډېر افغان کډوال افغانستان ته ستانه شوي دي.
یادې ادارې د کډوالو د نړۍوالې ورځې په مناسبت ویلي چې د بېشمېره کورنیو لپاره هېواد ته ستنېدل یوازې د یوې نوې مبارزې پیل دی او دغو کډوالو ته د خدماتو رسول خورا ستونزمن شوي
دغې ادارې روښانه کړې چې ډېری راستانه شوي کډوال داسې سیمو ته تللي چې هلته اسانتیاوې خورا محدودې دي او د ژوند لومړني خدماتو ته لاسرسی نه لري.
د ملګرو ملتونو د بشري مرستو د همغږۍ ادارې پر نړیواله ټولنه غږ کړی چې له دغو راستنو شویو کورنیو تر څنګ ودرېږي.
دا په داسې حال کې ده چې له ګاونډیو هېوادونو په ځانګړي ډول له پاکستان او د ایران څخه د افغان کډوالو د جبري ایستلو لړۍ په بېساري ډول ګړندۍ شوې ده. ډېری دغه کډوال په داسې حال کې هېواد ته ستنېږي چې په افغانستان کې د بېکارۍ کچه خورا لوړه شوې او د نړیوالو مرستو کچه بیا د پام وړ کمه شوې ده.
بلخوا، د بښنې نړیوالې سازمان هم د کډوالو د نړیوالې ورځې په مناسبت ویلي چې میلیونونه افغان کډوال په ټوله نړۍ کې له شړلو سره مخ دي. د دغه سازمان په وینا، راستانه شوي افغانان په هېواد کې دننه له سخت بشري بحران او د بشري حقونو له سختو سرغړونو سره مخامخ کېږي.
باوري سرچینو افغانستان انټرنشنل ته ویلي چې په بدخشان کې د طالبانو ترمنځ اختلافات لا پسې زیات شوی او د دغې ډلې د خپلمنځي نښتې احتمال ډېر شوی دی. سرچینې وايي، د طالبانو مشر د زابل لپاره د دغې ډلې د والي مرستیال او ناراضه قوماندان جمعه فاتح «باغي» بللی او د هغه د ځپلو امر یې کړی دی.
د وروستیو معلوماتو له مخې، په کندهار کې د طالبانو رهبرۍ دغه ناراضه قوماندان «ياغي» بللی او د هغه د ځپلو امر یې صادر کړی دی.
سرچینې وایي، کندهار دا پرېکړه وروسته له هغې وکړه چې د طالبانو د لوی درستیز په ګډون د طالبانو لوړپوړو چارواکوله جمعه فاتح سره څو پړاوه خبرې اترې بېپایلې پای ته ورسېدې. جمعه فاتح نه یوازې د کندهار له لارښوونو سرغړونه کړې ده، بلکې تر خپل امر لاندې ځواکونو او درنو وسلو باندې په تکیه کولو سره یې، مرکزي حاکمیت په ولسي پاڅون ګواښلی دی.
جمعه فاتح څوک دی او څنګه واک ته ورسېد؟
جمعه فاتح د بدخشان د درواز سیمې له طالب قوماندانو څخه دی، د جمهوري نظام له سقوط څخه څه باندې لس کاله وړاندې له طالبانو سره یوځای شوی او د پخواني حکومت د امنیتي ځواکونو پر ضد یې جګړه کړې ده. هغه د کابل له سقوط څخه شاوخوا یو کال وړاندې، د بدخشان پر ستراتیژیکو سیمو په برید او د جهاد له دورې څخه د پاتې شویو وسلو د لویو زېرمو په نیولو سره، د درواز په حوزه کې خپل نفوذ ټینګ کړ.
د طالبانو له بیا واکمنېدو وروسته، نوموړی د نسي ولسوالۍ د ولسوال په توګه وګومارل شو او په تېرو څلورو کلونو کې یې په سیمه کې خپل سیاسي، نظامي او اقتصاد نفوذ په پرلهپسې ډول پراخ کړ. پلویانو یې هغه ته د «درواز فاتح» او «د درواز سیمو عمومي امیر» لقبونه کاروي.
خو د فاتح د واک او خپلواک دریځ ورځ تر بلې زیاتوالي، د کندهار رهبري اندېښمنه کړه. د طالبانو مشر شاوخوا پنځه میاشتې وړاندې د هغه د نفوذ د کمولو لپاره نوموړی د زابل د والي د مرستیال په توګه وګوماره. فاتح له یوې نیمې میاشتې ځنډ وروسته زابل ته لاړ، خو له لږه موده وروسته بېرته خپل ټاټوبي بدخشان ته ستون شو او اوس له دوو میاشتو زیات وخت کېږي چې خپلې دندې ته له ستېدو ډډه کوي.
د طالبانو داخلي سرچینې وايي، جمعه خان فاتح د زابل د ماموریت پرمهال داسې معلومات ترلاسه کړی وو چې ګواکي طالبان د هغه د نیولو یا له منځه وړلو پلان لري. د سرچینو په ینا، همدې مسلې هغه اړ کړ چې په ناڅاپي ډول د بدخشان نسي ولسوالۍ ته ستون شي او خپل پوځي چمتووالی زیات کړي.
د ناراضه قوماندان ۱۰ زره کسیز ځواک
جمعه فاتح د غبرګولي په ۱۱مه د نسي ولسوالۍ د «جویدره» په کلي کې خپلو پلویانو ته په یوه غونډه کې بېسارې وینا وکړه. هغه ادعا وکړه چې یوازې په نسي ولسوالۍ کې په بشپړو سپکو او درنو تجهیزاتو سمبال۲۵۰۰ وسله وال کسان لري او د بدخشان او شمالختیځ په بېلابېلو سیمو کې یې د وفادارو وسلهوالو کسان شمېر ۱۰ زرو کسانو ته رسېږي.
د افغانستان انټرنشنل ځانګړې څېړنې او موندنې ښيي چې د درنو او ستراتیژیکو وسلو د لرلو په اړه د دغه قوماندان ادعاوې له میداني واقعیتونو او شته شواهدو سره سمون لري. د سرچینو په وینا، د هغه د پوځي ځواک بنسټ د ډاکټر نجیبالله د واکمنۍ او د جهاد له دورې پاتې د وسلو د څلورو سترو زېرمو نیول دي.
د جمعه فاتح وسلې
د سرچینو په وینا، دغه وسلې پخوا د جمعیت اسلامي د پخواني ځواکمن قوماندان «ایشان برهان» پورې تړاو درلود. د هغه له مړینې وروسته یې د قوماندان زیدالله په نوم یوه کس ساتنه کوله. ویل کېږي، جمعه فاتح او د هغه کسانو په یوه خونړي برید کې زیدالله او د هغه څو نږدې کسان د جومات ته پر لاره ووژل او ورپسې یې د شورین سیمې او د خوګز او خرکت کلیو د وسلو زېرمې تر خپل کنټرول لاندې راوستې.
د بدخشان د پخواني پولیسو د چارواکو د راپورونو له مخې، د وسلو درې زېرمې په بشپړ ډول نوې او نهکارول شوې وې او د ډاکټر نجیبالله د واکمنۍ له دورې پاتې وې.
د راپورونو له مخې، په دغو زېرمو کې ۱۰ د ۸۲ مليمتري توپونه، ۱۰ غرني هاوانونه، ۱۵ دشکې، ۱۰ زیکویکونه، د «AGS» وسلې، د هوايي دفاع وسلې او په ټولیز ډول له زرو څخه زیاتې سپکې او درنې وسلې موجودې وې، چې ډېره برخه یې کلاشینکوفونه وو.
یوې بلې سرچینې ویلي، د نسي ولسوالۍ د شورین په سیمه کې ۳ زیکویکونه، ۱۳ پیکاوې، ۱۴ د «D-۳۰» توپونه، ۳۶ کلاکوفونه او شاوخوا ۲۷۰ کلاشینکوفونه زېرمه شوي وو، چې وروسته د جمعه فاتح لاس ته ورغلل او له دغو وسلو څخه کار اخیستل شوی دی.
دوو سرچینو چې یو یې د پولیسو پخوانی چارواکی هم دی ویلي چې په دغو زېرمو کې یوه سټینګر الوتکهضد توغندیزه وسله هم موجوده وه، چې د جمعه فاتح لاس ته ورغله او وروسته یې وپلورله. سرچینې همداراز تاییدوي چې جمعه فاتح، د دغو زېرمو ترڅنګ، په تېرو څلورو کلونو کې د درواز سیمې د سرو زرو له کانونو څخه د ترلاسه شویو لوړو عوایدو په کارولو، د قاچاق له بازارونو څخه په پراخه کچه پرمختللې سپکې او درنې وسلې هم پېرلې دي.
د کړکېچ اصلي لامل؛ پیسې او د سرو زرو کانون
د سرچینو په وینا، د جمعه فاتح او د کندهار د مشرتابه ترمنځ اختلاف یوازې نظامي اړخ نه لري، بلکې د اقتصادي ګټو پر سر هم سخت مخالفت لري. د طالبانو مشر شاوخوا یوه میاشت وړاندې د درواز سیمې د سرو زرو په کانونو کې د استخراج د بشپړ درولو امر صادر کړ. هممهاله، په بدخشان کې د طالبانو والي مولوي اسماعیل غزنوي د جمعه فاتح څو نږدې کسان د شکي ولسوالۍ د «قتقتي» د سرو زرو په کان کې د ناقانونه استخراج، باج اخیستنې او له کارګرانو سره د نښتو په تور ونیول. خو دغه کانونه چې د ولسي اعتراضونو د پراخېدو د اندېښنو له امله د څو اوونیو لپاره تړل شوي وو، اوس بېرته پرانیستل شوي دي.
شنونکي باور لري، هغه څرګندونې چې جمعه فاتح د جویدره په غونډه کې وکړې او هغه پوځي ګواښونه چې یې مطرح یې کړل، د طالبانو مشر ملا هبتالله ته مستقیم خبرداری ګوت څنډنه وه. د دوی په اند دا دریځ وروسته له هغې غوره شو چې د نوموړي لاسرسی د دغو مالي سرچینو له عوایدو پرې شو او اداري او سیاسي فشارونه پرې زیات شول.
د خلکو راټولونه او کلیو ته سفرونه
جمعه فاتح په تېره یوه میاشت کې د نسي ولسوالۍ بېلابېلو کلیو ته پراخ سفرونه پیل کړي او هڅه کوي له خلکو سره خپل ملاتړ تازه او هغوی وسلهوال کړي. د نوموړي نږدې کسانو د دغو لیدنو انځورونه او ویډیوګانې په ټولنیزو رسنیو کې خپرې کړې دي.
د درواز سیمې ځايي سرچینې وایي، جمعه فاتح له کلیوالو غوښتي چې د «خپل عزت او د سرو زرو د کانونو د کنټرول د دفاع» لپاره د هغه وسلې ترلاسه او ځانونه پرې سمبال کړي.
سره له دې چې هغه په خپل ټاټوبي نسي ولسوالۍ کې د طالبانو پر ضد د سلګونو کسانو اعتراضونه تنظیم کړي، خو د شکي ولسوالۍ درې معتبرو سرچینو افغانستان انټرنشنل ته ویلي چې د دغو سیمو اوسېدونکو د جمعه فاتح د وسلو له منلو ډډه کړې او نه غواړي د هغه او کندهار ترمنځ جګړه کې ښکېل شي.
وروستی بنبست او د کندهار نظامي چمتووالی
د جمعه فاتح یو نږدې کس مولوي ذبیحالله په نسي ولسوالۍ کې یوې ولسي غونډې ته په وینا کې د طالبانو مشرتابه ته په ښکاره د ولسي پاڅونونو خبرداری ورکړ. د طالبانو استخباراتي سرچینو هم کندهار ته راپور ورکړی چې جمعه فاتح په رسمي ډول د طالبانو د حکومت پر ضد نظامي چمتووالی نیسي. د راپورونو له مخې، جمعه فاتح په تېره یوه میاشت کې د نسي ولسوالۍ له شورین سیمې نه دی وتلی او هلته د سنګرونو په جوړولو او د شورین له سیمې څخه د بدخشان د راغ سیمې پر لور د یوه سړک په جوړولو بوخت دی؛ هغه اقدام چې د دغو سرچینو په باور د جګړې د چمتووالي برخه ده.
د بدخشان د حساس وضعیت له امله طالبانو تر اوسه په احتیاط عمل کړی، خو باوري سرچینې وایي، وروسته له هغې چې کندهار د جمعه فاتح د استعفا وړاندیز رد کړ او هغه هم زابل ته له ستنېدو انکار وکړ، کندهار بدخشان ته د ځانګړو ځواکونو او تجربهلرونکو قطعاتو لېږل پیل کړي دي. د سرچینو په وینا، د طالبانو مشرتابه د دغه بدخشاني قوماندان د ځپلو پرېکړه کړې او سیمه د یوې پراخې نښتې له ګواښ سره مخ ده