لبنان کې د اوربند له پیل وروسته د اسراییل په تازه بریدونو کې ۱۶ کسان وژل شوي
رویټر خبري اژانس راپور ورکړی چې په لبنان کې د اوربند له پیل څخه یوازې څو ساعته وروسته، د اسراییل په تازه بریدونو کې لږ تر لږه ۱۶ کسان وژل شوي دي. د لبنان دفاع ادارې ویلي، چې دا مرګوني بریدونه د دغه هېواد په سویل او د بقاع په دره کې شوي دي.
د لبنان د کورنۍ دفاع ادارې او رسنیو تایید کړې چې دا بریدونه د شنبې په ورځ د غبرګولي په ۳۰مه د دواړو خواوو ترمنځ د هوکړې له عملي کېدو څو ساعته وروسته شوي دي.
اسراییلي چارواکو ادعا کړې چې دا بریدونه یې د حزبالله له لوري د توغول شویو توغندیو په ځواب کې کړي دي. د راپورنو له مخې، په دغو مرګونو بریدونو کې یو تر ټولو خونړی برید د لبنان د سویل په باریش ښارګوټي کې پر یوې درې پوړیزې استوګنیزې ودانۍ شوی، چې په پایله کې یې د یوې کورنۍ څلور غړي، پلار، مور او د هغوی دوه ماشومان وژل شوي دي.
د دې ترڅنګ د لبنان پوځ هم تایید کړې چې د کفر رومان او نبطیه په لاره کې د اسراییل په یو بل برید کې د دوی یو سرتېری وژل شوی دی.
بلخوا، د اسراییل یو پوځي چارواکي ویلي چې حزبالله د جمعې په شپه د لبنان په سویل کې پر اسراییلي ځواکونو له ۵۰ څخه ډېر توغندي وتوغول چې له امله یې دوی د دغې ډلې پر اهدافو ځوابي بریدونه وکړل. د اسراییل پوځ چې د لبنان سویلې سیمې یې لاندې کړې دي، په یوه اعلامیه کې ویلي چې د حزبالله دا بریدونه د اوربند له تړون څخه ښکاره سرغړونه ده.
