خیبر پښتونخوا: بنو ولسوالۍ کې دوو پرلپسې چاودنو کې اووه کسان وژل شوي او درې نور ټپیان دي
د خیبر پښتونخوا د بنو ښار څخه شاوخوا ۴۰ کیلومتره لرې د برغنتو اړوند د احمدزي پولیس حوزې په سیمه کې په دوو پرلپسې چاودنو کې اووه کسان وژل شوي او درې نور ټپیان شوي دي.
ځايي پولیس افسر ارشد خان افغانستان انټرنشنل-پښتو ته ویلي، لومړۍ چاودنه هغه مهال وشوه کله چې په یوه ډاټسن موټر کې ځايي خلک روان وو او په لاره کې پرې چاودنه وشوه، چې له امله یې یو شمېر کسان ووژل شول او ټپیان شول.
نوموړی زیاتوي چې د پېښې له ځایه د ټپیانو د لېږد پر مهال پر دویم موټر هم چاودنه شوې، چې په پایله کې یې نور کسان هم وژل شوي دي.
د پولیسو د معلوماتو له مخې ټول وژل شوي کسان د هاتيخېلو قوم پورې تړاو لري او ملکي وګړي بلل شوي دي.
د ځايي سرچينو په وینا یاد قوم د ځايي وسلوال ډلو پر ضد لښکر جوړ کړی او د هغو پر ضد جنګیږي.
بل لور ته د خیبر پښتونخوا ایالت اعلی وزیر سهېل اپریدي دغه پېښه غندلې او ویلي یې دي چې د غمجنې کورنۍ به یوازې نه پرېږدي.
د یادونې وړ ده چې تر دې مهاله کومې وسله والې ډلې د برید مسولیت نه ده منلی.
