سپاه پاسداران: د هرمز تنګی تړل شوی او بېړۍ باید ورته نږدې نه شي
د ايران د سپاه پاسداران سمندري ځواکونو اعلان کړی دی چې د هرمز تنګی یې د هر ډول بېړیو پر مخ تړلی دی. دغه ځواک د امریکا له خوا د اوربند په پلي کېدو کې د «ژمنو د نقض» او په لبنان کې د «اسراییل د بریدونو» په غبرګون کې له ټولو بېړیو غوښتي چې دغه تنګي ته نږدې نشي.
د ایران دولتي خبري اژانس، مهر د شنبې په ورځ د غبرګولي په ۳۰مه راپور ورکړی چې د سپاه پاسداران مسندري ځواکونو د هرمز تنګي تړل د واشنګټن او تلابیب له خوا د ژمنو له نقض کېدو سره په غبرګون کې «لومړی ګام» بللی دی.
دغې قوماندانۍ خبرداری ورکړی چې که د امریکا او اسراییل «تېري» دوام ومومي، نو د ایران اسلامي جمهوریت ځواکونه به په سیمه کې نور او سخت ګامونه پورته کړي.
دا پرمختګ په داسې حال کې رامنځته کېږي چې تر دې وړاندې په سویس کې د امریکا د ځانګړي استازي او د ایران د بهرنیو چارو د وزیر عباس عراقچي ترمنځ د تخنیکي خبرو اترو د ترسره کېدو هڅې روانې وې، خو وروستي راپورونه ښيي چې دا مذاکرات نه دي ترسره شوي او د هرمز تنګي د پرانیستلو برخلیک په ناڅرګند حالت کې دی.
