اسراییل د اوربند په لومړیو ساعتونو کې په لبنان کې ۵ کسان ووژل
د لبنان دولتي رسنیو راپور ورکړی دی چې د شنبې په ورځ د دغه هېواد په سویل کې د اسراییل په هوايي او بېپیلوټه الوتکو بریدونو کې لږ تر لږه پنځه کسان وژل شوي دي. دا بریدونه د اسراییل او حزب الله ترمنځ د اوربند له عملي کېدو څو ساعته وروسته شوي دي.
د لبنان دولتي اژانس ویلي دي چې اسراییلي جنګي الوتکو او ډرونونو د جمعې په شپه او د شنبې په سهار د نبطیه سیمې په بېلابېلو برخو کې پرله پسې بریدونه کړي دي، چې له امله یې ګڼ شمېر د استوګنې ودانۍ او کورونه ویجاړ شوي دي. دغه راز د شنبې په سهار وختي، د اسراییل توپخانې هم د نبطیه ښار او د هغه شاوخوا سیمې تر سختو بریدونو لاندې نیولې وې.
د یوه امریکایي چارواکي په وینا، اسراییل او حزبالله په لبنان کې د دوو اړخیزو نښتو او دښمنیو له زیاتوالي وروسته، د جمعې په ورځ پر اوربند هوکړه کړې وه. د اسراییل یوه لوړپوړي چارواکي او د حزبالله دوو سرچینو هم رویټرز اژانس ته د دغې هوکړې پخلی کړی و. یاد امریکایي چارواکي ویلي وو چې دغه متارکه او اوربند باید د جمعې په ورځ د ځایی وخت له مخې د مازدیګر په څلورو بجو په رسمي توګه پیل شوی وای.
