یونیسف: په پاکستان کې له میلیونه ډېر ماشومان د زده‌کړو پر ځای کار ته اړ دي

د ملګرو ملتونو د ماشومانو د ملاتړ صندوق (یونیسف) او د پاکستان د بشري حقونو کمېسیون په ګډ راپور کې راغلي چې په پاکستان کې له اته میلیونو ډېر ماشومان په ماشومانو پورې تړلو کارونو بوخت دي او له شپږو میلیونو زیات ماشومان له خطرناکو او سختو کارونو سره مخ دي.
راپور وایي، بېوزلي د ماشومانو د کار تر ټولو لوی لامل دی او اغېزې یې تر ډېره پر هغو کورنیو پرېوځي چې ټیټ عاید او د زده‌کړو کچه لري.
د راپور له مخې، هلکان د نجونو په پرتله ډېر کار کوي او ډېری یې په هغو دندو بوخت دي چې روغتیا او ژوند ته یې ګواښ پېښوي.
په راپور کې ویل شوي چې د ماشومانو یوه لویه برخه په کورنیو کروندو، کوچنیو فابریکو، ورکشاپونو او د کور دننه کارونو کې بوخت دي.
یونیسف او د پاکستان د بشري حقونو کمېسیون خبرداری ورکړی چې د ماشومانو کار د هغوی پر روغتیا، زده‌کړو او رواني هوساینې ناوړه اغېزې لري. راپور زیاتوي چې ډېری کارکوونکي ماشومان ښوونځیو ته نه ځي، اوږده کاري ساعتونه تېروي او له ټپونو، ناروغیو، ستړیا او ذهني فشار سره مخ وي.