د شوروي ځواکونو له وتلو ۳۷ کاله وروسته او د امریکايي ځواکونو له وتلو پنځه کاله وروسته، روسیه یو ځل بیا افغانستان ته ورګرځېدلې او د طالبانو له حکومت سره یې د دفاعي همکارۍ نوی تړون لاسلیک کړی دی.
د راپور له مخې، په ۱۹۸۹ کال کې چې د شوروي اتحاد وروستی سرتېری د امو سیند پر «دوستۍ پل» له افغانستانه ووت، ډېرو کمو کسانو به باور درلود چې روسیه به په نږدې راتلونکي کې یو ځل بیا افغانستان ته راستانه شي.
د شوروي اتحاد له ړنګېدو سره د افغانستان جګړه د مسکو لپاره یوه ستره ماتې بلل کېده او ځینو شنونکو دغه جګړه د شوروي اتحاد د زوال له مهمو لاملونو څخه ګڼله.
راپور زیاتوي چې د روسیې ولسمشر ولادیمیر پوتین، چې هغه مهال د «کې جي بي» یو ځوان افسر و، افغانستان د روسیې د تاریخ یوه ستره د سپکاوي ډکه تجربه ګڼله. خو اوس، په داسې حال کې چې روسیه په اوکراین کې په جګړه بوخته ده او نړیوال پام غزې او منځني ختیځ ته اوښتی، مسکو په پټه افغانستان ته بېرته ورګرځېدلی دی.
د راپور له مخې، روسیې له طالبانو سره د دفاعي همکارۍ یو نوی تړون کړی چې له مخې به یې د طالبانو ځواکونو ته روزنه او تجهیزات برابروي.
همداراز روسیه یوازینی هېواد دی چې طالبان یې د افغانستان د رسمي حکومت په توګه په رسمیت پېژندلي دي.
ځینې شنونکي باور لري چې روسیه غواړي یو ځل بیا افغانستان د سیمې او اوراسیا د سیاسي نفوذ لپاره وکاروي. د هغوی په وینا، افغانستان د روسیې، چین او لوېدیځ ترمنځ د ستراتیژیک رقابت مهم مرکز پاتې شوی دی.
راپور د امریکا پخوانی پوځي حضور هم یادوي او وایي، لکه څنګه چې شوروي ځواکونه په ۱۹۸۹ کال کې له افغانستانه وتلو ته اړ شول، امریکایي ځواکونه هم په ۲۰۲۱ کال کې وتلو ته اړ شول. د راپور په وینا، د امریکا یو شمېر پوځي او سیاسي چارواکي لا هم افغانستان د مرکزي اسیا د نفوذ لپاره مهم بولي.
راپور په پای کې د پخواني سي ای اې افسر مېلټ بیارډن څرګندونې رااخلي، چې خبرداری یې ورکړی و چې افغانستان باید له پامه ونه غورځول شي، ځکه د دې هېواد جغرافیه او سیاسي اهمیت لا هم د نړیوالو قدرتونو په سیالیو کې مهم رول لري.
