هندۍ سیالګره انکیتا کمار د افغانستان له ۱۲ ورځني سفر له بشپړولو او په ټولنیزو رسنیو کې له شهرت وروسته د افغانستان کې د روانو حالاتو په اړه ویلي چې افغانې نجونې د کار او زده کړو ازادي غواړي.
د ټریبیون انډیا د راپور له مخې، انکیتا کمار د مۍ له ۱۱مې تر ۲۳مې نېټې پورې د افغانستان بېلابېلو ولایتونو ته سفر کړی، له خلکو سره یې لیدلي او د طالبانو له امنیتي پوستو هم تېره شوې ده.
هغې ویلي چې تر دې وړاندې یې څلور ځله د افغانستان د سفر هڅه کړې وه، خو ویزه یې نه وه منل شوې. وروسته یې د تاجکستان له لارې افغانستان ته د داخلېدو پلان جوړ کړ او له همدې لارې دغه هېواد ته ننوتله.
انکیتا وایي چې د سفر پر مهال یې نه یوازې له طالب چارواکو سره لیدلي او خبرې یې کړې، بلکې د افغانستان په بېلابېلو سیمو کې یې له افغان ښځو سره هم لیدنې کړې دي.
هغې ویلي چې طالبانو د افغان ښځو ژوند یې ډېر اغېزمن کړی، ځکه هغوی لا هم د سختو محدودیتونو لاندې ژوند کوي او د تعلیم، کار او ازادۍ غوښتونکي دي.
نوموړې زیاتوي چې که څه هم د افغانستان په اړه نړیواله انځور د ناامنۍ دی، خو د سفر پر مهال یې ځان خوندي احساس کړ او حتی طالبانو ورته په ځینو ځایونو کې چای هم ورکړی دی.
انکیتا کمار وايي چې یوازې د کورنۍ یو غړي ته یې د سفر معلومات وو او والدینو ته یې ویلي وو چې تاجکستان ته تللې ده.
