د پاکستان د پارلمان غړی: بلوچستان ته تلونکې ټولې لارې «ټي ټي پي» او «بي اېل اې» نیولي دي
د پاکستان د پارلمان غړی عادل خان بازی وایي، چې بلوچستان ايالت ته تلونکې لارې د پاکستاني طالبانو تحریک (ټي ټي پي) او د بلوڅ ازادۍ غوښتونکې ډلې (بي اي اې) نیولي او تړلي دي.
بازي د پارلمان غونډې ته په وينا کې وويل، وزيران بايد د بلوچستان ایالت ستونزو ته پاملرنه وکړي ځکه يوازې دغه ایالت کولی شي چې د پاکستان د اقتصاد ستونزه هواره کړي.
هغه وويل، پاکستان کې چې د ترهګرۍ کومه څپه راغلې ده لامل په هېواد او په بلوچستان ايالت کې بې روزګاري ده.
بازي د بلوچستان ايالت د سړکونو د بنديز په تړاو د پارلمان غړو ته په خطاب سره وويل، «زه بلنه درکوم د ډېره اسماعيل خان لخوا د کراچۍ يا د ډېره لخوا راسره په سړک بلوچستان ته لاړ شئ دا ټول سړکونه بند دي هغه لارې بي اېل اې او ټي ټي پي نيولې دي».
نوموړي وويل، د بلوچستان ايالت امنيتي وضعيت ډېر خراب دی، د ورځې ۳۰، ۳۰ ګاډي سوځول کيږي چې بیې یې په ميليونونو کلدارې دي ځکه اقتصاد تباه کېږي.
هغه د کورنيو چارو پر وزير محسن نقوي نيوکې وکړې چې «هواي ميدان ته راغلو او بېرته ستون شو».
