یوه کابل مېشتې: افغانستان د ښځو لپاره زندان او موږ د جنسیت په نوم ځورول کېږو
له کابل نه یوې نجلۍ چې له خپلې مور سره ښار ته د سودا کولو لپاره تللې وه او د طالبانو له سپکاوي ډک چلند سره مخ شوې افغانستان انټرنشنل ته په لېږلې پیغام کې ویلي: «افغانستان د ښځو لپاره زندان دی او زموږ جرم همدا دا دی، چې ښځې یو».
هغې په ژړغوني غږ ویلي، که څه هم بشپړ حجاب یې مراعت کړی و؛ خو بیا هم د میروېس میدان په سیمه کې د طالبانو امربالمعروف محتسبانو د حجاب نه مراعتولو په تور درولې او پوښتنې یې ترې کړې دي.
هغې زیاته کړې: «طالبانو هڅه کوله ما موټر ته په زور یوسي؛ خو مور مې ډېرې زارۍ ورته وکړې او وروسته یې خوشې کړم». نوموړې دا هم ویلي، چې طالبانو د خلکو په مخ کې د «لوېدیځ حجاب» کولو اړوند د سپکاوي ډکې خبرې ورته کړې.
دغه مېرمن په ژړغوني غږ له نړۍوالې ټولنې غوښتنه کوي، چې افغان ښځې له دغه سخت او کړاوه ډک زندانه وژغوري. هغې ویلي:« په ژوند کې لومړی ځل دی، چې داسې له وحشت ډکه شېبه تجریه کوم».
