د پېښور سترې محکمې د لسګونه هغه کسانو عریضې رد کړې چې د پاکستاني تابعیت ادعا لري
د پېښور سترې محکمې د شاوخوا ۱۳۰ هغو کسانو عریضې نهدي منلې، چې د «پي او ار »یا «اېسيسي» کارت لرونکي دي او د پاکستاني تابعیت ادعا یې کړې وه. د یادې محکمې د قاضیانو په وینا؛ د نادرا لهخوا جوړ شوی اداري مېکانیزم شته، نو یاد کسان باید د حقایقو معلومولو لپاره هماغه لاره وڅاري.
دغه محکمې ویلي، چې یاد کسان باید لومړی د پاکستان د احصایې او ثبت ادارې (نادرا) ته مراجعه وکړي او د تابعیت د تصفیې سند لپاره رسمي غوښتنلیک ورکړي او بیا کولای شي د محکمې له لارې دغه چاره پرمخ یوسي.
محکمې څرګنده کړې، عریضه کوونکي مخکې له دې چې د نادرا قانوني لړۍ بشپړه کړي محکمې ته مراجعه کړې؛ نو له همدې امله د دوی د عریضو اورېدنه نهکېږي. په پرېکړه کې نادرا ته امر شوی، چې د ټولو غوښتونکو غوښتنلیکونه ومني، هغوی ته د اسنادو د سپارلو نېټې ورته وټاکي او هره قضیه په منظم ډول ثبت کړي.
همدارنګه محکمې ویلي، چې د ټولو قضیو د تصفیې بهیر باید د لومړي غوښتنلیک له نېټې څخه په څلورو میاشتو کې دننه بشپړ شي. د نادرا د معلوماتو له مخې؛ زرګونه غوښتنلیکونه تر اوسه ترلاسه شوي، چې ځینې یې رد شوي، ځینې منظور شوي او پاتې یې لا تر ارزونې لاندې دي.
