د بلخ اوسېدونکی: د طالبانو د رامنځته شویو شرايطو له کبله ازاد یو، خو د بندیانو احساس کوو
د مزار شریف یوه اوسېدونکي افغانستان انټرنشنل ته په لېږلي پیغام کې ویلي، طالبانو د سختو شرايطو په رامنځ ته کولو سره د خلکو ژوند ناارامه کړی او پر ډېریو وګړو یې د ژوند کړۍ تنګه کړې ده. نوموړي زیاته کړې: «د طالبانو د رامنځ ته شویو شرايطو له کبله ازاد یو؛ خو د زندانیانو احساس کوو».
دغه اوسېدونکي په افغانستان کې فقر، لوږه، د کار نشتوالی، د مرستو او همکاریو بندېدل او په دولتي ادارو کې خلکو ته نه پاملرنه هغه ستونزې یادې کړې، چې دامهال د طالبانو تر واک لاندې په پراخه کچه ترسترګو کېږي.
د هغه په خبره؛ طالبانو د خلکو ازادي لهمنځه وړې او ډېری وګړي په سختو شرایطو کې ژوند کوي. نوموړي ویلي: «کار نهشته، فقر او لوږه زیاته ده، دولتي روغتونونه پيسې اخلي، ناروغ مري ډاکټر نه وي، دا کوم حالت دی؟ دغه وضعیت له ژوند بېزاره کړي یو او اوس په مرګ خوشحاله یو».
د مزار شریف دغه اوسېدونکي په ملګرو ملتونو او نړۍوالې ټولنې غږ کړی، چې د افغانانو غږ واوري او د روان حالت په وړاندې یو اقدام وکړي.
