د قطر د ګازو په تاسیساتو کې د چاودنې له امله ۵۴ کسان ټپیان او ۱۸ نور تري تم شوي دي
د قطر د طبیعي ګازو په اصلي تاسیساتو کې چاودنې او اورلګېدنې ۵۴ کسان ټپیان او ۱۸ نور تري تم کړي دي. د قطر د انرژۍ شرکت په یوه بیان کې ویلي، چې دغه پېښه په راس لافان صنعتي ښار کې د برزان سیمهییزو ګازو رسولو تاسیساتو د بیا پیل پرمهال رامنځته شوې ده.
د بیان له مخې؛ د یکشنبې په ورځ (د غبرګولي ۳۱مې) تر پېښې وروسته د ژغورنې او بېړني غبرګون ډلې سملاسي د اور د مهار لپاره سیمې ته واستول شوې او اور اوس کابو شوی دی. د قطر د انرژۍ شرکت په خپله اعلامیه کې دغه تاسیساتو ته د احتمالي زیان د جزییاتو یادونه نهده کړې.
د قطر د کورنیو چارو وزارت هم په دغه پېښه کې د ۵۴ کسانو د ټپي کېدو خبر ورکړی او اعلان یې کړی، چې د ۱۸ لادرکه شویو کسانو د موندلو لپاره د پلټنې عملیات روان دي. یاد وزارت د چاودنې لامل «تخنیکي ستونزه» وبلله او زیاته یې کړه، چې د عامه خوندیتوب لپاره هیڅ ګواښ نشته.
وړاندې یوه عیني شاهد چې په دوحه کې د راس لافان په سویل کې اوسېږي رویټرز ته ویلي و، چې په سیمه کې د یوې زورورې چاودنې غږ اورېدل شوی.
