د بلوچستان د ترهګرۍ ضد محکمې ماهرنګ بلوڅ ته د عمري بند سزا واوروله
د بلوچستان د ترهګرۍ ضد یوې محکمې د بلوڅانو د یووالي غورځنګ مشرې ماهرنګ بلوڅ ته د «اېفسي» یوه سرتېري د وژنې اړوند قضیه کې د عمري بند سزا واوروله. د محکمې د پرېکړې له مخې؛ د ګوادر غونډې پرمهال د ډبرو وېشتلو پېښه کې یاد سرتېری لومړی ټپي او وروسته یې د سختو ټپونو له امله ساه ورکړه.
د څارنوالۍ د دریځ له مخې؛ دغه پېښه د ګوادر په یوه ولسي غونډه کې شوې وه. محکمې په خپله پرېکړه کې ماهرنګ بلوڅ په قضیه کې مسووله بللې او د عمري بند سزا یې پرې لګولې ده.
د نوموړې ترڅنګ یادې محکمې د بلوڅانو د یووالي غورځنګ یو بل مخکښ غړي صبغت الله ته هم په یوې قضیې کې د عمري بند سزا اورولې ده.
یاده قضیه د ګوادر راجي مُچي غونډې پرمهال د اېف سي سرتېري شبیر بلوڅ تر مړینې وروسته ثبت شوې وه. ماهرنګ بلوڅ او د هغې ملاتړو لاتراوسه د محکمې د یادې پرېکړې په اړه کوم رسمي غبرګون نهدی ښودلی.
د بلوڅانو یووالي غورځنګ له څو کالو راهیسې په بلوچستان کې د بشري حقونو د خوندیتوب لپاره فعالیت کوي، د پاکستان حکومت په تېر ۲۰۲۵کال کې د یوه پرلت پرمهال د یاد غورځنګ د مشرې ماهرنګ بلوڅ په ګډون د دغه غورځنګ ګڼ مشران ونیول او له یو کال راهیسې په زندان کې دي.
