اردوغان د ایران ولسمشر ته؛ په مذاکراتو کې د خنډ رامنځتهکوونکو پر وړاندې باید هوښیار واوسو
د ترکیې ولسمشر طیب رجب اردوغان له مسعود پزشکیان سره په ټلیفوني خبرو کې ویلي، انقره د ایران او امریکا ترمنځ له وروستۍ هوکړې هرکلی کوي او چمتو ده چې د دغه بهیر د سولهییز بشپړېدو لپاره لازم ملاتړ برابر کړي. هغه ویلي په مذاکراتو کې د خنډ رامنځتهکوونکو پر وړاندې باید هوښیار واوسو.
د ترکیې د ولسمشرۍ دفتر په یوه خبرپاڼه کې ویلي، اردوغان له پزشکیان سره په خبرو کې ټینګار کړی چې «هغو کسانو ته باید متوجه واوسو چې هڅه کوي د مذاکراتو په بهیر کې خنډونه او سبوتاژ رامنځته کړي.»
د خبرپاڼې له مخې، د ترکیې ولسمشر ویلي چې د سیمې د سولې او ثبات د پیاوړتیا لپاره نوي ګامونه اخیستل هم اړین او مهم دي.
اردوغان زیاته کړې چې د ایران او امریکا ترمنځ د تفاهم د عملي کېدو او د تاوتریخوالي د کمېدو هره هڅه کولی شي د سیمې د امنیت او ثبات په ټینګښت کې مهم رول ولوبوي.
دا څرګندونې داسې مهال کېږي چې د تهران او واشنګټن ترمنځ د وروستي تفاهملیک په اړه د سیمې او نړۍ په کچه بېلابېل غبرګونونه روان دي او یو شمېر هېوادونه د دغه بهیر د بریالي دوام ملاتړ کوي.
