د روسیې پر ورونژ ښار د اوکراین برید پنځه کسان وژلي
د روسیې د ورونژ سیمهییزو چارواکو ویلي چې د اوکراین د توغندیز برید په پایله کې په دغه ښار کې پنځه کسان وژل شوي او لسګونه نور ټپیان دي. د اوکراین پوځ ویلي چې په ورونژ سیمه کې یې هغه فابریکه په نښه کړې چې د توغندیو لپاره الکترونیکي پرزې تولیدوي.
د روسیې د ورونژ سیمهییز مسوول الکساندر ګوسېف ویلي چې د دوشنبې په ورځ د اوکراین د توغندیو برید له امله په ورونژ ښار کې پنځه کسان وژل شوي او لسګونه نور ټپیان شوي دي.
هغه ویلي چې د ورونژ سیند په کیڼه څنډه کې صنعتي تاسیسات تر ټولو زیات زیانمن شوي دي. د هغه په وینا، له برید وروسته اور لګېدلی، چې وروسته کنټرول او مړ شوی دی.
بل لور ته، د اوکراین پوځ ویلي چې د ورونژ په سیمه کې یې هغه فابریکه په نښه کړې چې د توغندیو لپاره الکترونیکي پرزې تولیدوي.
د اوکراین د پوځ په وینا، دغه تاسیسات د روسیې د دفاعي صنعت یوه مهمه برخه جوړوي.
