ابلاردو ډي لا اسپریلا د کولمبیا ولسمشریزې ټاکنې وګټلې
رویټرز خبري اژانس راپور ورکړی، چې د کولمبیا د ټاکنو د لومړنیو پایلو له مخې ملتپال وکیل او سوداګر ابلاردو ډي لا اسپریلا د دغه هېواد د نوي ولسمشر په توګه ټاکل شوی دی. هغه چې د خپلو پلویانو لهخوا د «پړانګ» په نوم یادېږي، په دویم پړاو ټاکنو کې یې خپل سیال اېوان سپېدا ته ماتې ورکړه.
نوموړي د ټاکنیزو کمپاینونو پرمهال د امنیت ټینګښت، د ناقانونه وسلهوالو ډلو پرضد د سختو اقداماتو او د اقتصادي ودې ژمنې کړې وې. هغه ویلي، چې د دولت د لګښتونو کمښت، د مالیاتي بنسټ او د انرژۍ سکټور پراختیا لپاره به کار وکړي.
نوموړي دغه راز د تېلو د اکتشاف پروژو د بیا پیل او د تولید د زیاتوالي پلانونه هم وړاندې کړي دي. د ټاکنو پایلې د کولمبیا په سیاست کې یو مهم بدلون بلل کېږي، ځکه ډي لا اسپریلا د اوسني ولسمشر ګوېستاو پیټرو له تګلارو سره مخالف دریځ لري او د امنیتي او اقتصادي سیاستونو د بدلون غوښتونکی دی.
ټاکل شوې ده، چې نوموړی د روان زېږدیز کال (د اګست په ۷مه) د کولمبیا د نوي ولسمشر په توګه تر لوړې وروسته خپله دنده پیل کړي.
