د البیروني پوهنتون یو زدهکړیال: د بندیزونو له امله له زدهکړو زړه توري شوي یو
د البیروني پوهنتون یو زدهکړیال افغانستان انټرنشنل ته په رالېږلي پیغام کې ویلي، چې د طالبانو لهخوا لګول شويو محدودیتونو یې د زدهکړو بهیر سخت اغېزمن کړی او له زدهکړو یې زړه توري کړی دی.
هغه وایي، د نوي بندیز له مخې په پوهنتون کې د ځیرکو موبایلونو کارونه له شنبې ورځې (د غبرګولي ۳۰مې) راهیسې منع شوې. د نوموړي په وینا؛ د ټېکنالوژۍ په اوسني دور کې د زدهکړو ډېری چارې ځیرکو موبایلونو پورې تړلې دي او دغه بندیز د دوی ښوونیز بهیر ګډوډوي.
هغه زیاتوي، چې هره ورځ د ږېرې نه پرېښودلو له امله ورته خبرداری ورکول کېږي او همدارنګه له خولۍ پرته د پوهنتون دننه د ورتګ اجازه نه ورکول کېږي. هغه وایي، دغه ډول محدودیتونه د ځوانانو د زدهکړو انرژي کموي او د هغوی د زړه توري کېدو لامل کېږي.
د راپورونو له مخې؛ په وروستیو محدودیتونو کې د دولتي ادارو او پوهنتونونو دننه د ځیرکو موبایلونو کارول منع شوي او د سرغړونې په صورت کې د موبایل د ماتولو، له دندې د کارکوونکو د ګوښه کولو او ان د عدلي څار ګواښونه هم شامل دي.
د طالبانو دغه بندیز په کور دننه او بهر بېلابېل غبرګونونه راپارولي دي.
