ډونالډ ټرمپ: د هُرمز تنګي وضعیت ښه دی او د تېلو جریان تر ټولو لوړې کچې ته رسېدلی
د امریکا ولسمشر ډونالډ ټرمپ ویلي، چې د هرمز تنګي وضعیت «ډېر ښه» دی او د تېلو انتقال تر اوسه له بېساري کچې لوړ شوی دی.
دغه څرګندونې د امریکا د بهرنیو چارو وزارت فارسي ژبې اکاونټ له لارې خپرې شوې دي، چې پکې د ولسمشر له قوله ویل شوي: «موږ اوس د تېلو تر ټولو لوړ جریان لرو، تر هغه زیات چې مخکې هېڅکله د دې تنګي له لارې نه و تېر شوی.»
نوموړي زیاته کړې چې د هرمز تنګي د پرانیستې وضعیت له امله د انرژۍ د لېږد بهیر عادي او باثباته دی.
په همدې بیان کې د امریکا ولسمشر دا هم ویلي چې «یو هېواد به هېڅکله اټومي وسلې ترلاسه نه کړي»، خو په څرګند ډول یې د کوم هېواد نوم نه دی اخیستی.
د امریکا د بهرنیو چارو وزارت د دغه پیغام له مخې، واشنګټن د انرژۍ د جریان د ثبات او د سیمې د امنیتي وضعیت د کنټرول په اړه مثبت دریځ لري.
