د اېټالیا لاریون؛ لاریون کوونکو د طالبانو ځپونکو سیاستونو د پای ته رسېدو غوښتنه وکړه
لسګونه افغان کډوالو، د بشري حقونو فعالانو، زدهکړیالانو، اېټالوي وګړو، د بشري حقونو سازمانونو له استازو سره یوځای د اېټالیا په پلازمېنې روم ښار کې د افغان ښځو په ملاتړ لاریون وکړ. لاریون کوونکو د طالبانو ځپونکو سیاستونو د پای ته رسېدو غوښتنه وکړه.
لاریون کوونکو دارنګه له افغان ښځو او نجونو سره پیوستون څرګند کړ. دوی د طالبانو د ځپونکو سیایتونو پرضد اعتراض وکړ او د نړۍوالې ټولنې او طالبانو ترمنځ یې د اړیکو عادي کولو لپاره د هر ډول هڅو پای ته رسېدو غوښتنه وکړه.
لاریون کوونکو «د زدهکړې، کار او ازادۍ» شعارونه ورکړل او د هنري او سمبولیکو نندارو له لارې یې د افغانستان اوسنی وضعیت انځور کړ. دغه ننداره په ځانګړې توګه له زدهکړو، کار او ټولنیزو فعالیتونو د ښځو پر محرومیت متمرکزه وه.
لاریون کوونکو دارنګه پر اروپایي هېوادونو غږ وکړ، چې د دغه محدودیتونو عادي کېدو مخه ونیسي. لاریون کوونکي وایي: «د افغان مېرمنو حقونو ته نه پاملرنه او د بشري حقونو له بنسټیزو اصولو ښکاره سرغړونه اوسني کړکېچن وضعیت ته د نړۍوالو بېغوري ښیي».
لاریون کوونکو په افغانستان کې د اوسنیو شرایطو د عادي کېدو او د ځینو هېوادونو لهخوا د طالبانو د حکومت د بلنې په اړه ژوره اندېښنه څرګنده کړې او په نړۍوالو ادارو او د بشري حقونو سازمانونو یې غږ کړی، چې د هغو ازادیو د بېرته ترلاسه کولو لپاره عملي او اغېزمن اقدامات وکړي چې له افغان مېرمنو او نجونو تر وړل شوې دي.
