پنټاګون د ایران د جګړې لګښتونو پوره کولو لپاره ۸۰ مېلیارد ډالره اضافي بودجې ته اړتیا لري

په راپور کې راغلي، دغه شمېره د هغه ۲۹ مېلیارد ډالرو شمېرې څخه د پام وړ لوړوالی ښیي چې د پنټاګون چارواکو په ګډون د جګړې وزیر پېټ هېګسټ په دې وروستیو کې په کانګرس کې وړاندې کړې وه.
سرچینو فاکس ته دا هم ویلي، تمه کېږي چې د امریکا ولسمشر ډونالډ ټرمپ به (د جولای په ۲مه) نېټه د پنټاګون له لویو قراردادیانو سره وګوري؛ ترڅو دوی وهڅوي چې د توغندیو سیسټمونو تولید ګړندی او د امریکا د وسلو زېرمې ډکې کړي.
یوې سرچینې وویل: «قراردادیانو لا دمخه ویلي، چې د کانګرس له اضافي تمویل پرته پنټاګون نه‌شي کولی قرارداد لاسلیک کړي او دوی هم نه‌شي کولی د اټکلونو پربنسټ تولید پیل کړي». د سرچینې په خبره: «دوی یو تړون ته اړتیا لري».
تر دې وړاندې وال سټریټ ژورنال هم راپور ورکړی و، د امریکا دفاع وزارت له قانون جوړوونکو غوښتي چې د ایران د جګړې او ځینو نورو ژمنو د لګښتونو پوره کولو لپاره ۸۰ مېلیارد ډالره اضافي بودجه ځانګړې کړي. تمه کېږي، چې دغه غوښتنه به ډېر ژر کانګرس ته وړاندې شي.