د کاناډا په مونټرال کې د ډزو له امله لږترلږه درې کسان وژل شوي دي

پولیسو ویلي، چې د نښتې پرمهال یو ملکي وګړی او بریدګر هم وژل شوي دي. د مونټرال پولیسو مشر فادي داغر یاده پېښه «بوږنوونکې» بللې او ویلي یې دي، چې دا په تېرو ۲۴ کلونو کې لومړی ځل دی چې د مونټرال د پولیسو یو افسر د دندې پرمهال وژل کېږي.
د عیني شاهدانو په وینا؛ د نښتې پرمهال لسګونه ډزې وشوې او امنیتي ځواکونو په چټکۍ سره سیمه کلابنده کړه. په خواله رسنیو کې خپرې شوې ویډیوګانې هم د پولیسو او وسله‌وال کس ترمنځ د ډزو تبادله ښیي.
د کاناډا ځایي چارواکو اعلان کړی، چې د برید د انګېزې په اړه څېړنې روانې دي.