د بدخشان ولایت د شغنان ولسوالۍ یوشمېر اوسېدونکو افغانستان انټرنشنل ته په رالېږلي پیغام کې ویلي، چې د یادې ولسوالۍ د سړکونو خرابوالی د سیمې د خلکو له مهمو او اوږدمهاله ستونزو څخه ده چې تراوسه ورته اساسي حللاره نهده موندل شوې.
د دوی په وینا؛ د ولسوالۍ په بېلابېلو برخو کې سړکونه سخت زیانمن شوي، کندې کپرې، ښوېیدنې او خطرناکې سیمې لري چې د موټرو تګراتګ یې ستونزمن او ناامنه کړی دی.
د یادې سیمې اوسېدونکي زیاتوي، چې د بارانونو او واورو په موسم کې د سړکونو وضعیت لاپسې خرابېږي او د ترافیکي پېښو ګواښ پهکې په څرګند ډول لوړېږي. د شغنان اوسېدونکي وایي، د همدې خرابو لارو له امله هر کال لسګونه مرګونې پېښې رامنځته کېږي او ګڼ خلک خپل ژوند له لاسه ورکوي.
د دوی په خبره، د سړکونو خرابوالی یوازې د انساني تلفاتو لامل شوی نهدی؛ بلکې روغتیايي خدمتونو، ښوونیزو مرکزونو او بازارونو ته د خلکو لاسرسی یې هم سخت محدود کړی دی.
هغوی وایي، سره له دې چې دولتي چارواکي هرکال د دغه لارو د بیارغونې او ترمیم ژمنې کوي؛ خو تر اوسه دغه ژمنو عملي پایله نهده ورکړې او د سړکونو په وضعیت کې د پام وړ بدلون نهدی راغلی.
د ځایي اوسېدونکو په وینا؛ هغه چارې چې ترسره شوې دي، یا سطحي او لنډمهالې وې او یا هم د ستونزې د بنسټیز حل لپاره بسنه نهکوي؛ نو له همدې امله اصلي ستونزه لاهم پرځای پاتې ده.
د سیمې خلک زیاتوي، په وروستیو کلونو کې د دغه خرابو لارو له امله د پېښو او تلفاتو کچه تر دې بریده لوړه شوې چې د پخوانیو جګړو له کلونو سره د پرتلې وړ بلل کېږي. د دوی په باور؛ د سړکونو خرابوالی اوس د سیمې د خلکو د ژوند لپاره په یو جدي ګواښ بدل شوی دی.
د شغنان اوسېدونکي له طالبانو غواړي، چې یادې ستونزې ته بېړنۍ پاملرنه وکړي او د سړکونو د بنسټیزې بیارغونې پروژه عملي کړي؛ څو د انساني تلفاتو مخه ونیول شي او په دغه مهمه لاره کې د تګراتګ خوندیتوب ښه شي.
دا په داسې حال کې ده، چې په وروستیو میاشتو کې د ترافیکي پېښو کچه لوړه شوې او د پام وړ انساني تلفات یې رامنځته کړي دي. د راپورونو له مخې؛ د دغه پېښو ځانګړی لامل د لارو او سړکونو خراب وضعیت ګڼل کېږي.
