د امریکایۍ غورځېدلې الوتکې پیلوټ وايي د ایران په فضا کې یې هیښوونکی ډرون لیدلی
یو امریکايي پیلوټ چې د روان کال په اپرېل میاشت کې یې اېف-۱۵ الوتکه د ایران په فضا کې تر ویشتل کېدو وروسته راپرځېدلې وه، ادعا کړې چې له الوتکې تر وتلو مخکې یې په هوا کې د ایراني ډرونونو یو غیرمعمولي او هیښوونکی جوړښت لیدلی و.
د سياېناېن د راپور له مخې، دغه پیلوټ چې وروسته د امریکايي ځانګړو ځواکونو له خوا ژغورل شوی، استخباراتي چارواکو ته ویلي چې ګڼ شمېر ایراني بېپیلوټه الوتکې یې په هوا کې داسې لیدلې چې د یوه واحد جوړښت په څېر یې حرکت کاوه او بڼه یې د «سمندر ي ژوي» یا «جیلی فش» په څېر ښکارېده.
د راپور له مخې، دغه الوتکه د ایران او امریکا ترمنځ د وروستۍ جګړې پر مهال لومړنۍ امریکايي الوتکه وه چې د ایران په فضا کې وویشتل شوه. پیلوټ له الوتکې تر وتلو څو ساعته وروسته وژغورل شو، خو د وسلو د سیسټم مسوول افسر تر یوې ورځې ډېر د ایران په غرنیو سیمو کې پټ پاتې شو او وروسته د ژغورنې ځواکونو وموند.
سرچینو ویلي چې پیلوټ د ډرونونو داسې جوړښت تشریح کړی چې لوی ډرونونه یې په سر کې وو او کوچني ډرونونه یې لاندې د پښو په څېر ځړېدل. یوې بلې سرچینې ویلي چې پیلوټ په هوا کې د ډرونونو دومره ګڼ او متراکم حضور لیدلی و چې د ماینونو له ډک میدان سره یې ورته والی درلود.
د امریکا استخباراتي ادارو کې د پیلوټ د دې ادعاوو په اړه بحثونه روان دي. ځینې چارواکي باور لري چې که د هغه لیدنه سمه وي، نو دا به د ایران د ډرون ټکنالوژۍ په وړتیاوو کې یو مهم پرمختګ وښيي. خو نور چارواکي د دې احتمال هم مطرح کوي چې ښايي پیلوټ د ټپونو، جګړهییز فشار یا د پېښې د شرایطو له امله وضعیت په بشپړه توګه نه وي درک کړی.
راپور زیاتوي چې پیلوټ له الوتکې د غورځېدو پر مهال په سر ټپي شوی هم و.
